Vawiin khan Hemodialysis Unit, Aizawl Civil Hospital a siam thar chu Health Minister Pu Lalthanzaran a hawng.

Khuallian chuan Mizoramah kal thalo in enkawl ngai an pung zel a, Kal thalo inenkawlna hmun Aizawl Civil Hospital a peihfel a ni chu lawmawm a tih thu a sawi a. Kal thlak ngai leh kal thalo in enkawl ngai leh a bik takin mi harsa damlo(kal thalo) ten an tangkaipui ngei a beisei thu a sawi bawk. Minister chuan hriselna kawnga Mizoram sawrkarin hmalakna chi hrang hrang a neih zinga thenkhat te tarlangin Aizawl Civil Hospital ah Dialysis khawl 6 leh Lunglei Civil Hospital ah 3 a awm mek a, National Health Mission fund atangin District Civil Hospital hrang hranga dah vek turin hmalak mek a nih thu a tarlang bawk. Hemi bakah hian New Economic Development Policy(NEDP) sum atangin District zawng zawng hmasawnna a tan cheng Vaibelchhe 1 theuh leh Falkawn Referral Hospital tih changtlun nan sum engemaw zat Mizoram Sawrkarin a ruahman thu a sawi bawk.

Hemodialysis Unit ah hian Dialysis khawl thar 4 leh khum 4 dah a ni a. Khawl 2 hi Mizoram Sawrkar pek a ni a, a dang 2 leh khum hi Dr.DK Pahari, Vice-Chairman, Medica Super Speciality Hospital, Kolkata hawnna inkhawma khual zahawm ni bawk in ama mimal sum atanga a hlan a ni. Khual zahawm chuan hemodialysis unit hawn theih a ni chu lawmawm tiin Mizoram a healthcare hmasawnna atan Mizoram chu tanpui a in peih reng thu a sawi bawk. Hemodialysis Unit tih puitlin theih nan hian Rural Bank Zarkawt, Apex bank Zarkawt leh mi inphal te hnen atanga tanpuina sum cheng 4,45,500/- dawn a ni.

Hawnna inkhawm hi he unit hawn a nih theih nan a sulsutu pawimawh tak Pu PC Zoramsangliana MLA in a telpui a, Dr.K.Lalbiakzuala, Director Hospital & Medical Education in a kaihruai a ni. Dr. Zoramthanga HOD, Medicine in Dialysis report pe in Aizawl Civil Hospital ah kum 2001 atanga 2016 thleng mi enge maw zat in Dialysis an tih thu a tarlang a kum 2016 ah mi 87 in dialysis an ti bawk a ni.

Inkhawm hi DR.K.L Remsanga, Medical Seperintendent in lawmthu sawina in a khar a ni.