National Urban Livelihood Mission (NULM) hnuaia City Level Executive Committee for Lunglei Town te chu vawiin chawhma khan Lunglei DC Conference Hall-ah Lunglei DC leh Committee Chairperson ni bawk Pi Lalzarmawii, IAS kaihhruaiin an thukhawm a, he Mission hnuaia hmalak tawhna te thlir hona an nei.

Pi Lalzarmawii chuan NULM tum bulpui ber sawiin, a bulthut a mi harsa te inzawmkhawm pawl chak leh ngelnghet tak (Self Help Group) din a, chumi kaltlanga khawpui a retheihna tihtlem a ni, a ti a. Mi harsa chhungkuate tana eizawnna tur hlawkzawk leh hnathawh tur tha hmuhpui a, an harsatna sutkianpui bakah eizawnna ngelnghet an neih theihna tura kawng kawhhmuh hi a ni, a ti. NULM hnuaia component paruk (6) te thil tum tlangpui te a tarlang nghal a ni.

Lunglei DUDO leh Member-Secretary ni bawk Pu Andrew Lalhruaia chuan NULM hnuaia Lunglei Town Area chhunga an hmalakna report a pe a. Heng component paruk zinga Social Mobilisation & Institutional Development (SM & ID) hnuaia Self Help Group (SHG) 105 an enkawl mek thu leh Support to Urban Street Vendors (SUSV) hnuaia street vendor 156 an hmuh chhuah tawh thu te a tarlang a. Self-Employment Programme (SEP) hnuaiah loan lak theih chi thum awm in, mimal tan 16 leh group tan 6 loan la thei tura an buaipui sak tawh thu a sawi a ni. Employment through Skill Training & Placement (ST&P) hnuaiah mi 834 hnenah thiam thil (skill) training, Sector 8 leh Course 10 ah Training Partner 3 kaltanga an buatsaih tawh thu a tarlang a. Lunglei Town Area chhunga Home 7 te hnenah tui dah khawlna tanky litre 1000 dawng theuh an pek thu a tarlang bawk a ni.

He meeting-ah zawhna leh chhanna hun hman a nih bakah Lunglei Ramthar Venga Remand Home chu thawmthat an remti nghal a ni.