Vawiin chawhnu khan Cable TV Digitalization Phase III leh Phase IV kalpui meka Mizoram district hrang tin dinhmun leh hmalak zel dan tur te sawiho a ni. He meeting, New Secretariat Conference Hall-a neih hi Pi Renu Sharma, IAS, Principal Secretary GAD chuan kaihruaiin, District tin atanga nodal officer-te leh Multisystem Operator (MSO) aiawhte an tel a ni.

Pi Renu Sharma chuan Sorkarin mipui harsatnate hrethiamin Phase III leh Phase IV area-a analogue signal pekchhuah mek tihtawp hun tur a sawn hlat hnu a hmalakna te chu tha thawkhat hle in a hriat thu a tarlang a. Sorkar laipuiin December ni 31 hnu ah chuan heng area-ah te hian analogue signal titawp tawh tura thu a pek avangin Nodal Officer-te leh MSC leh Local cable Operator-te pawh theih tawp chhuah a an target hlen ngei tum turin a chah a. GAD Principal Secretary chuan mipui zingah digitalization chungchang an hriat thiam tawk loh avanga ngaihven lo leh chhungkaw harsat vanga Set Top Box lei harsat te an awm avangin sorkar leh service provider-te chuan mipui tana awlsam zawkna tur kawng ngaihtuah turin a chah bawk a ni.

Vawiin meeting hian digitalization hna kal mek a tih tur la hmachhawn, Encryption kalpui vat a nih theih nana hmalak dan tur te sawiho a ni bawk a. District tam zawkah Phase III area-ah analogue signal hi tihtawp a ni tawh a. Phase III leh Phase IV area-ah te hian Set Top Box la neilo, analogue connection kaltlanga cable TV la en te chuan kumin December hnua ah chuan an en thei tawh dawnlo a ni.