Vawiin khan Lunglei DC Conference Hall-ah National Urban Livelihood Mission (NULM) hnuaia Committee pakhat Lunglei Town Vending Committe chu an thukhawm a. Lunglei DC leh Chairperson ni bawk Pi Lalzarmawii, IAS chuan meeting hi a kaihruai a ni.

Pi Lalzarmawii chuan NULM hnuaia component pakhat Support to Urban Street Vendors (SUSV)-in a thil tum sawiin, khawpui chhung kawngkama thil zuar te (street vendors/ hawkers) awmze nei zawka an inzawrhna hmun siamsak leh phalna (license) nei thlap a thil zawrh a nih theih nana hmalakna a ni, a ti a. Khawlaia thil zawrhte a thianghlim zawk nan leh a zuar tuten hamthatna tam zawk an hmuh theih nan thuam chak tum an nih tur thu a sawi a ni. Street Vending Zone kan thlan uluk a ngai tiin, damdawiin leh bazar hnaih lo, traffic tibuai lo leh veng mipuiten an chhawr tangkai theih tur a hmun atan kan thlan thiam a ngai a ni, a ti.

Pu Andrew Lalhruaia, Lunglei DUDO leh Member-Secretary ni bawk chuan SUSV hnuaia hmalakna tlangpui te tarlangin, street vendor 156 hmuh chhuah an nih tawh thu sawiin, Village Council 24 te nen tangkawpin Lunglei Town Area chhung hmun 16-ah Vending Zone tur an ruahman thu a tarlang a. Heng Vendor te tan hian The Mizoram Street Vendors (Protection of Livelihood and Regulation of Street Vending) Rules, 2015 leh Financial Literacy Campaign chungchangah zirtirna pek an nih tawh thu a tarlang a ni.

Meeting chuan The Mizoram Street Vendors (Protection of Livelihood and Regulation of Street Vending) Rules, 2015 hnuaia City Street Vending Plan chu a pawmpui a, Street Vendor te thuamchak tura Detailed Implementation Plan (DIP) pawh a pawmpui nghal a ni. Village Council te mahni veng chhunga Street Vending Zone tidanglam emaw telh belh duh te tan karkhat chhungin Secretary hriattir turin meeting chuan a remti bawk a ni.