Vawiin khan Health Minister Pu Lal Thanzara chuan Delhi a Health Ministers Meeting-ah telin Mizorama AYUSH hmalakna leh hma chhawp mek te a tarlang.

Minister chuan kum 2016-2017 chhunga fund te a hun taka pe tur leh medical plant chungchangah Mizoram ngaihsak lehzual turin Sawrkar Laipui a ngen a. National Health Mission hnuaia AYUSH doctor leh Allopathy doctor te hlawh in anga pe turin a ngen nghal bawk a ni. Pu Lal Thanzara chuan State sawrkarin AYUSH a din tirh atanga tun thlenga a din hmun sawiin District tinah AYUSH hospital a awm thu leh Thenzawlah khum 50 awm theihna tur AYUSH Hospital hawn a nih tur thu a sawi a. He hmun hi AYUSH Medical College-ah te pawh la hman theih tura beisei niin a puitlin theih nan Central Sawrkar puihna a ngen a, India Hmarchhak state-te chu tehna hrang hrangah ngaihnathiam turin a ngen bawk.

Tun dinhmunah Mizoramah District Hospital leh Community Health Centre hrang hrangah OPD/IPD 20 a awm a. AYUSH awmna Hospital-ah chuan OPD a inentir tura kal zingah za zela 12 te chuan AYUSH doctor-te an pan a ni. Mizoram sawkara Health Department hnuaiah AYUSH cadre hranpa siam ni tawhin tihchak zel tumin sawrkar chuan ruahmanna a siam a ni.