Mizoram Sawrkar a  Health Secretary Pu H. Lalengmawia, IAS chuan vawiin khan Kolasib ah khualbuk a hawng.

Khualbuk hi Kolasib Sub-Hqrs YMA President Pu C. Liankunga'n damlo in enkawl mi harsa zawkten man chawi lova an awm na tura a ruahman a ni a, he khualbuk ah hian riahna bakah eirawng bawlna choka, buhfai, gas leh mamawh thildang dah a ni a, damlo in enkawl tura kolasib pan thlenna tur emaw damdawi ina awmna tur neilo te chu a thlawnin an awm thei dawn a ni.

Khualbuk hawngtu Pu H. Lalengmawia chuan Pu C. Liankunga'n mi harsa zawkte hmakhua ngaia a phak tawka a luanchhuahna chu ropui a tih thu a sawi a, damlo mangang mi rethei te tan malsawmna nasa takin a thlen ngei a beisei thu a sawi.

 Khualbuk buatsaih chu thil namai a nilo tih tarlangin ken tel a ngah em em dawn a, damlo mi harsa zawk buaipui tu neilo chu thlenna ruahman sak ah a tawp mai dawnloa kawng hrang hranga buaipui an ngai dawn a Pathian rinchhan tak meuha kalpui chi ani tiin harsatna tamtak paltlang tur a awm dawn a, chu chu tawngtaina nena hmachhawn chi ani tiin khualbuk chu a hmang tangkai tu tur te tan bakah a buatsaih tu te tan malsawmna nasa tak thlen turin duhsakna a hlan a ni.

Pu H. Lalengmawia chuan mi rethei zawk te tana ruahman hetiang khualbuk chu thil intihhmuh chi tak ani tiin Mizoram hmun hrang hrangah mi nei zawk ten ruahman zel se kan chan aia chan chhe zawkte tan malsawmna nih tum theuh ang u a ti a ni.

Khualbuk ruahman tu Pu C. Liankunga chuan Kolasib damdawiin pan thin mi harsa tak tak damdawi ina hun rei tak awmna tur neilo mangang hmel a hmuh thin chuan hetiang hmun/khualbuk buatsaih turin chona a pe ani tiin mi harsa zawkte tan malsawmna a nih ngei theihnan kalkhawm te chu tawngtaipui ah a sawm a ni.