Vawiin khan Law and Judicial Minister Pu TJ Lalnuntluanga chuan a bial chhung khua Dilkawn, Kelkang leh Bethel Veng Champhaite tlawhin Sawrkar Department hotute nen mipuite kawmin an mamawh leh  harsatnate an  enfiah sak a ni.

Heng khua leh veng a tlawhnaah hian Law Minister chuan  khawtlang mamawh leh harsatna  zawng zawng vawi leh khatah a chinfel mai theih loh avangin a pawimawh dan ang zelin a  tahtawla hmalak thin anih thu a sawi a. Mipuite chu ram neitu thinlung pu a  thing leh mau humhalh  kawnga tanla turin a chah a. Kut tlingloa sum lakluh leh hlemhletna laka fihlim tura chahin, rilru puthmang dik  siam hmasak phawt chuan  hmasawnna dangte dik takin a kalpui theih ani, a ti a.Mamawhtute tana awlsam taka dawr theiha thuneitute an inchhawp hnai chu ram inkaihhruaina leh inrelbawlna kawnga bung thar anih thu a sawi  a. Minister chuan  hmasawnna dik leh tluantling nei turin moral development neih hmasak a ngai a, thinlung thianghlim, dikna, rinawmna leh taihmakna a khat mizia  kan neih hmasak a tul  a ni, a ti a. Khawtlang mipuite chu khawtlang leh ram tana rotling tur siam kawnga  tawiawm tlat turin a sawm a ni.

Vawiin hian khawtlang mipuiten  mamawh leh harsatna an neih te Minister leh Official te hnenah thlenin, Sawrkar Department hotuten an harsatna sutkian dan turte leh theih anih leh nih lohte an sawifiah zel a ni.

Minister Pu TJ Lalnuntluanga hi  Pu Alexander V. Chongthu, Addl DC;  Pi Ethel Rothangpuii,PD DRDA;  Pu Lalduhthlana, DFO; Dr R.Lalawmpuia, CMO; Pu J.Kapkima, EE, PHE; Pi Rebecca Laldinmawii Hrahsel,BDO; Dr Lallawmkima, DIPRO; Pu Vanlalmuanawma, SDO, PHE;  Pu Lalremmawia Colney, SDAO leh  Pu Thanliana Hauhnar, RO ten an tawiawm a ni.