Vawiin khan Social Welfare, AH & Vety, Excise & Narcotics leh Sericulture te changtu Minister Dr K. Beichhua chuan Lawngtlai bul Mampui kawng TS Hills-ah Lairam Isua Krista Baptist Kohhran (LIKBK) hnuaia Lairam Social Mission te hma laknaa harsatna hrang hrang neite a bika enkawlna hmun tur Lairam Rescue Centre sakna tur lungphum a phum.

Minister Dr K. Beichhua chuan tun hmaa a rawngbawl tawh thinna ruihhlo do leh enkawl zui ngaite enkawl leh thei tura Pathianin Excise & Narcotics Department (E&ND) leh Social Welfare Department (SWD) a enkawltir chu a lawm thu leh phur taka thawh zel a tum thu a sawi a. Ruihhlo chi hrang hrangin kan ram min runin, kan thalai, kan tu leh fate chhanchhuah ngaiin an awm mek a, anni chhanchhuah leh enkawl chhunzawm hna chu Pathianin kan kovah a nghat a, a rawngbawl hna ropui tak a ni, a ti a. LIKBK-in Rescue Centre an din tur chu lawmawm a tih thu leh Social Welfare Director leh hotu dangte'n an hriatpui leh zel chu vanneihthlak a tih thu sawiin, Minister leh Department-a thawkte tan chauh chuan chu rawngbawl hna chu zawh chi a nih loh avangin kohhran, tlawmngai pawl leh Zoram mipui zawng zawng thawh hopuiah a sawm nghal.

Lungphum phum inkhawm hi LIKBK AGS i/c Service Rev. Dr L.H. Lalpekhlua chuan kaihruaiin, hunserh a hmang a.LIKBK-in kawng hrang hranga chhanchhuah hna an thawh leh enkawl ngaite tana rawng an bawlna te a tar lang. LIKBK General Secretary Rev. B. Zazawna Lai chuan lawm thu sawina leh tawngtaina hun hmangin, hun tihtawp a ni.

He Lairam Rescue Centre sakna tur hian LIKBK Central Hmeichhe Pawl chuan budget insiamin, Rs nuai 20 an thawh khawm atangin tunah hian bul tan mek a ni.

Minister hi a nupui Dr Zochhuanawmi, AH & Vety Director Dr Hmarkunga, E&ND Commissioner Pu Ngurchungnunga, Women & Child Development Director Pi Vanlalpianpuii, SWD Director Pi A. Vanlalzawni, Sericulture Joint Director Pu Rozawna leh official dang eng emaw zatin an tawiawm a. Hun hmanah hian Lai Autonomous District Council (LADC) Chief Executive Member (CEM) Pu T. Zakunga leh a thawhpuite bakah, LIKBK puipate an tel kim hle.

Lairam Rescue Centre lungphum a phum zawh hian Dr K. Beichhua chuan DRDA Siaha District Project Director a nih laia August ni 6, 2019-a boral ta Pu T. Vanlalmalsawmsanga (Vala) chu Lawngtlai Chandmary-a an inpuiah a ral nghal a. Chumi hnuah Lawngtlai AH & Vety office tlawh lehin, National Bank for Agriculture and Rural Development (NABARD) hnuaia Rural Infrastructure Development Fund (RIDF) sum Rs nuai 85 senga State Veterinary Hospital sak mek chu a enfiah a. He Vety Hospital sak hna hi AIE Construction, Aizawl te'n an thawk mek a. Building sak mek hi duh anga a len tawk loh avangin a 2nd Floor-a awm tura ruahman sa dispensary chu tuna an building sak mek sira ram awlah sak leh mai ni se, tiin ruahmanna siam a ni.

Hemi hnu hian Minister chuan thingtlang mi rethei zawkte'n class 6 atanga class 12 thleng a thlawn liau liauva zirna an dawn theihna tur, Ministry of Tribal Affairs atanga Rs vaibelchhe 16 senna tur Eklavya Model Residential School (EMRS) sak mek, Lawngtlai daia mi chu a en leh a.Lairam Motherless Home leh Lairam Christian Medical Centre & Hospital te a tlawh leh bawk.