1816/2023-2024

Champhai the 9th September 2023 - Champhai North bialtu MLA leh Vice Chairman, H&FW Board Dr ZR Thiamsanga chuan vawiin khan Hnahlan Police Beat Post ruahman thar a hawng a ni.

Hnahlan Police Beat Post thar hi Hnahlan Tlangnuam Vengah ruahman niin, a bultan nan Head Constable Ramhmingthanga hovin thawktu police paruk post an ni a. Hnahlan Police Beat Post hian khaw pakua - Hnahlan, Khuangphah, Vaikhawtlang, Vapar, N,Diltlang, Murlen, Tualcheng, Lungphunlian, Selam te a huam a. Hnahlan hi Free Movement Regime hnuaiah Myanmar leh India khua leh tui te luh leh chhuahna hmun Entry and Exit Point tur atan Sawrkarin a ruat  bawk a ni.

Hawnna inkhawm Pu Lalrinpuia Varte, SP Champhai District kaihhruaiah Dr ZR Thiamsanga chuan Hnahlan Police Beat Post ruahman thar chu Hnahlan leh a chhehvel khuate himna leh kawng hrang hranga hmasawn zelna kawngah ruhrel pawimawh leh hmasawnna ropui tak a ni tiin, he Police Beat Post neih theihna tura thahnemngai taka hma la tu khawtlang hruaitute, tlawmngai pawlte leh Police hotute chungah lawmthu a sawi a. Kawng hrang hranga hmasawnna kan neih theihnan kan khawtlang ah himna leh muanna a awm hmasak a tul a ni tiin, Champhai North bialtu MLA chuan Hnahlan Police Beat Post a thawktute chu an mawhphurna tha taka hlen chhuak tur leh khawtlang mipuite tana innghahna ngam ni tura tan la turin a chah a. Sawrkar hmunhmate enkawl that chu khua leh tui tin te mawhphurna a ni bawk a ni tiin, Police tha ti chak zawnga hma lo la zel tur leh neitu rilru pu a a hmunhmate lo enkawl pui turin a ngen a. Hnahlan Police Beat Post chu hun lo kal zel turah Police Station puitling ni thei tura hmalak chhoh a tum thu sawiin MLA Fund kaltlangte a la thuam that chhoh zel a tum thu a sawi a ni.

A sawi zelnaah Vice Chairman, H&FW Board chuan Covid-19 hrileng, ramri buai, raltlante buaipui ngai leh harsatna hrang hrang Sawrkarin a hmachhawn chungin hmasawnna hna hrang hrangte theihtawpa thawh zel anih thu sawiin Champhaiah pawh tun hnaiah MYC Coaching Centre leh GNM Nursing School hawn niin Class pawh tan thuai ani dawn a, Champhai District-a Sub Centre zawng zawng pawh Health & Wellness Centre-ah hlankai tawh niin, Civil Hospital thuam that hna pawh chak taka thawh mek zel a ni a ti a. Sawrkarin theihtawp a chhuahna chu mipuiten lo hriatpui tura ngenin, ram leh hnam hmasawn zelna tura thawhho puiah a sawm a.

Champhai DC Pu James Lalrinchhana pawhin thu sawiin, Hnahlan ah Police Beat Post thar ruahman fel a ni ta chu Champhai District pum tan rahbi thar pawimawh tak a ni tiin,vhe Police hmun pawimawh tak hi anih tur ang ngei tha taka kalpui anih theihnan thawktute leh khawtlang mipuite lo tangruala, Dan leh thupek kenkawh kawngah theihtawp lo chhuah tlang turin a chah a ni.

Vawiin hawnna inkhawm ah hian Sawrkar official, khawtlang hruaitute, tlawmngai pawl hrang hrang aiawhte an tel a. Rev V. Lalmuanpuia, PCI Pastor chuan hunserh hmangin, Pu Lalmalsawma Hnamte, Addl SP Champhai District in report a pe a, Pu Lalremruata Cherput, VCP Hnahlan, Pu Chawnglianmawia, President Joint YMA Hnahlan ten thu an sawi bawk a ni.