1815/2023-2024

Dated Serchhip, the 9^th September, 2023: Nizan khan Dr. R. Lalthangliana, Minister Higher & Technical Education etc. chuan Thenzawl Auditorium-a Mizo Students’ Union 21st General Assembly, Palai thlah zan chu khuallian niin a hmanpui a. He hunah huan Dr L. Thangmawia, MLA leh Vice Chairman Human Resources Development Board ni bawk chu khual zahawm a ni.

Thusawiin Khuallian chuan College hrang hranga zirtirtu leh thawktu indaihlohna chu ramin sum harsatna a tawh mek avangin duh anga hnawhkhah mai theih nilo mahse a theih ang anga hnawhkhah tum a nih thu a sawi a. Covid hri leng avangin Mizoram Sawrkarin harsatna a tawk nasa a, he hri leng piah lamah ram dangin an tawh ve loh harsatna tam tak Mizoramin nasa takin a tuar a. Bangladesh, Myanmar leh Manipur-ah Zofaten harsatna nasa tak an tawh avangin theihtawp chhuahin Mizoram chuan a tanpui a, Covid hri leng mai bakah hriat lawk loh harsatna hrang hrangin ram a tlakbuak avangin Sawrkar pawhin an tum ang leh ruahman angin hma an la thei lo niin Minister chuan a sawi.

Dr R Lalthangliana chuan MSU General Conference-ah thalai rual kalkhawmten Mizo nunphung a taka an ti lang chu entawn tlak tiin, hei hian kan nunah thui takin thu a sawi ngei ang, a ti a; Conference zawh hnuah pawh hnam thinglung kan put zel nan a tangkai hle dawn a ni, a ti. Mizo ten danglamna tak kan neih zingah tlawmngaihna hi sawifiah thiam a har a, pi pu chen a kan rohlu heng tlawmngaihna, aia upa zahthiamna leh rinawmna te chhawm nung zelin, Pathianin kan thinlunga a dah ngheh tlat hmangaihna leh lainatna te vawng nung zel ang u, tiin zirlai kalkhawmte a sawm a ni.

Ram ropuite chuan an hnam chhan nana beitute an zahin an chawimawi nasa thin a, keini pawhin kan hmaa mi ropui kaltate sulhnu kan ngaihhlut thiam a tul a ni, Dr R Lalthangliana chuan a ti a. Khawvel thiamna sang tawh takah hian thiamna tak tak kan neih loh chuan kan ramah hnathawk turin hnam dang an rawn lut zel anga, min chimralna kawng a la ni thei dawn a; chuvangin, tih tak taka kan beih hi a tul tak zet a ni, a ti a. Thiamna tak tak neilo tan chuan hna hmuh a harsa tawlh tawlh dawn, chumi atan chuan i inbuatsaih ang u, tiin Dr R Lalthangliana chuan zirlaite a fuih a ni.

Khualzahawm Dr. L. Thangmawia, MLA pawhin thu sawiin Pathianin Mizo zirlai rualte thinlungah hnam hmangaihna thinlung a dah tlat mai hi thil mak leh thil ropui tak a ni, a ti. Kan Pathian hian zirna a ngaipawimawh em em a; chuvangin, kan hnam kan vei em em rual hian Mizo thalai ten zirna kawngah tan kan lak a ngai a ni, a ti a. Miin thiam taka an sawi avangin a nihna tak zirchiang hmasa lova mi thusawi pawm ngawt lo turin kalkhawmte a chah a. Kan ram hruaitute hian eng nge an tih thin, tihte pawh zirchian nachang hre turin zirlaite a chah bawk a ni.

MSU General Conference tiak zan, Palai thlah zan hi Samuel Lalruatdika, Asst. General Secretary in a kaihruai a. Samuel Zoramthanpuia, President, MSU pawhin thusawiin, kil hrang hrang atangin nek sawrin awm mah ila Pathianin kan hnam hi boral turin min din lo, a ti a. Mizote tan Mizoram hi inpui a ni a, kan unau hmun danga awm te tan hei lo hi chu pan tur an neih loh avangin, tulna avanga lo hawte lawm takin i lo dawngsawng ang u, tiin kalkhawmte a sawm a. Kan unaute tan vehbur kan khawn dawn lova, kan hak lai hi kan hralh anga an tan kan hlan ang, a ti.