Vawiin khan H&FW Minister Pu Lal Thanzara chuan Electric Veng YMA Golden Jubilee Programme Electric Veng YMA hall ah a hmanpui.

Khuallian Pu Lal Thanzara chuan kalkhawm te chibai bukin YMA chu Pathian min pek pawl ropui tak khawtlang tana nu leh pa chantling tak, a hnathawhte chu ngaisanga, chhawmnung zel turin member te chu a sawm a ni.YMA chu khawtlang tan mai nilo, sorkar tan pawha kutke tangkai tak ani tih sawiin, “Pawl ropui tak Mizo faten kan nei hi i lawm thar leh ang u” a ti. Golden Jubilee hmang thei tura veng chhung mipui te thawhhona chu fakin in lungrualna that vang anih thu a sawi bawk. Hruaitu hlui leh hruaitu kal lai mek te avanga he hun hman ani chu chhuanawm a tiin kalkhawmte chu YMA hnathawh chhunzawm zel turin a sawm bawk a ni.

Khualzahawm Pu Lalbiakzuala, Central YMA President pawhin thu sawiin, YMA hmalakna zauhzia leh mi zawng zawng a huam zia uar takin a sawi a, “YMA rawngbawlna hian tawpchin a nei theilo” a ti a. YMA chu ramchhung mi zawng zawng te in chhunfinna, vengchhung mitin te phuarkhawmtu leh mitin huap pawl anih thu a sawi bawk.

He Golden Jubilee lawmna programme hi Pu K.Lalthanmawia, President EYMA in a kaihruai a, hruaitu hlui sunna leh chawimawina hun te neiin Golden Jubilee Souvenir tlangzarhna leh section in elna lawmman semna khuallian Pu Lal Thanzara’n a neihpui bawk a ni.

Electric Veng Golden Jubilee lawmna hi veng chhung mipui bakah sawm bik thahnem tak ten hmangin tlaiah Golden Jubilee ruai theh nghal a ni.