High Powered Committee (HPC), Lunglei chuan vawiin chawma dar 11.00 khan Chief Minister’s Conference Hall-ah kum 2008-2012 chhunga HPC Annual Plan pawisa hmanga hmasawnna hna hrang hrang thawh dan thlirletna HPC Vice Chairman Pu Joseph Lalhimpuia hovin an nei.
Pu Joseph Lalhimpuia chuan “ 6.9.1990-a HPC, Lunglei hi din a nih hnuah 29.5.2009 khan a kalphung hi her remin, District Planning Board chu HPC-ah chhunfin a ni a; Chief Minister chairman-na hnuaiah budget hran neiin Legislative Assembly-ah hial passed a lo nit a a ni. Heng kan annual plan sum hi Department 23-te chuan district dangte tana thikawm khawpa Lunglei district tihhmasawnna atan an hmang thin a ni” a ti a. Lunglei district-in nasa zawka hma a sawn theihna turin ‘Special Development Initiative for Lunglei District’ tih chu Ministry hrang hrang 19 atanga hnukchhuak thei turin project package liantham tak Rs 104.77 crore chu Prime Minister’s Office –ah 9.11.2012 khan thehluh a nih tawh thu leh project thenkhat-te chu Ministry-ten an enfiah mek thu pawh Pu Joseph Lalhimpuia chuan a sawi bawk. Hei bakah hian HPC,Lunglei hmalaknain Lunglei District Baseline Survey hlawhtling taka neih a nih tawh thu leh chumi behchhan chuan ‘Lunglei District Vision Plan’ pawh buatsaih mek a nih thu a sawi a ni. Pu Jospeh Lalhimpuia chuan Mizoram sawrkarin HPC, Lunglei chu a duhsak avangin sawrkar chungah Lunglei district mipuite an lawm thu a sawi bawk.
HPC, Lunglei tan hian kum 2008-12 thleng khan Annual Plan pawisa cheng nuai 2025 pek a ni a; kum 2012-13 ah hian cheng nuai 600 ruahmansak a ni bawk. HPC, Lunglei-ah hian official leh non-official member an vaiin mi 6 an awm a, DC Lungleichu Member Secretary a ni.
Vawiin-a HPC Lunglei annual plan thlirletnaah hian hmasawnna hna thawh tawhte leh hna kal laite chu a lem nena entirin report kimchang pek a ni a; Dr. Lalrinchhana, Chief Planning Officer chuan Annual Plan 2012-13 chhunga hnathawh dante a sawifiah a ni. Hemi hnu hian Lunglei district chhunga officer-ten an hmachhawp leh ngaihdante chipchiar takin an sawiho a ni. He meeting hi Pu Lalkhama, Vice-Chairman, Mizoram State Planning Board (MSPB) te, Pu Haukhum Hauzel, Member & Secretary MSPB te, Pu V. Sapchhunga DC, Lunglei leh Pu P. Lalhmangaihzuala, Member, HPC, Lunglei ten an hmanpui a ni.
