Sorkar laipui hnuaia Ministry of Urban Development bultumin Aizawl-ah Regional Capacity Building training programme ni 3 awh tur neih mek a ni a. He training hi khawpui (Urban areas) enkawlna leh hmasawnna kawng hrang hranga hnathawhna atana inzirtirna tura ruahman a ni. He training hi Ministry of Urban Development hnuaia Agency, Infrastructure Development Finance Company (IDFC) leh Mizoram sorkara Urban Development & Poverty Alleviation Department leh Aizawl Municipal Council te tangkawpin a buatsaih a ni. Training hi chhawnghnih a buatsaih a ni a. Chhawngkhatna hi nimin khan Aizawl Municipal Council a Councellor te pualin ‘Reforms in Urban management’ tih thupui hmangin neih a ni. Chhawnghnihna hi vawiin pawh khan chhunzawm a ni a, naktukah pawh ‘Project Development in the Urban Contest’ tih thupui hmanga workshop hi neih leh a ni ang.

Vawiina training chhunzawmna chu Aijal Club-ah Pu R.L. Rinawma, Principal Secretary, urban Development & Poverty Alleviation, in a hawng a, training a tel hrang hrang official-te fuihin Mizoram Urban Development hmalakna hrang hrang kalpui mek anih thu leh chak zawka kalpui zel a tul thu te a sawi a, khawpui hmasawnna zelah mipuite tana mamawh hrang hrang a pun thu sawiin Urban Civic Service a pun avanga tanla theuh turin a fuih a ni.

Training programme ah hian khawpui enkawlna lama official hrang hrang heng Urban Development & Poverty Alleviation Department, Aizawl Municipal Council (AMC), Public Works Department (PWD), Public Health Engineering Department (PHED), Transport Department leh Police (Traffic) Department te leh Planning and Finance Department official pawimawhte an tel a ni.