Tualchhung Chanchinbu thenkhat ah Aizawl College hmun hrang hrang a zirlai admission hmulo 409 lai te luhna tur sorkar in a ngaihtuah sak loh avanga July ni 9, 2014 atanga lungawi lohna MZP ten lantir an tum thu a lo lang a. Hemi chungchang a sorkar hmalak tawhna te hetiang a ni :

(a) Honble Minister, Higher & Technical Education hovin MZP leh official pawimawh ten June thla bul lam khan meeting neiin an lo thlir ho tawh a. Principal zawng zawng te chu an theih ang ang a lo in pawt fan a zirlaite beidawng a siam lo tura ngen in a za tel tehmeuh dah belh an ni a.

(b) Hemi hnu hian Commissioner & Secretary hovin a chunga mite ho bawk hian ni 12 June ah meeting nei lehin hemi atang pawh hian mi engmaw zat tan admission ruahman leh a ni.

(c) Hemi chungchang thu bawk ah hian tukin zing khan Commissioner & Secretary Office ah MZP hruaitute leh Principal te inrawn khawmna neih a ni a. Tunah hian Aizawl khaw chhung College hrang hrang 8-ah kum hmasa 2013 aiin zirlai 858 in admission a pung a ni. Hetih lai hian zokhaw lama College changtlung tak tak seat an la neih theih dan chu hetiang hi a ni-Art subject ah 479, Science ah 65, a vaiin 544 lai zirlai an la admit thei a ni.

(d) Sawrkar lam harsatna :(1) Kan hmuh leh kan hriat theuh angin Aizawl khawpui chhunga kan college te hi hmun remlo tak tak ah rual awhna avangin a rem ang anga chei bawlin zirna an kalpui a. Nimahsela Class Room leh building in a dawl zawh loh chin a awm ta a ni.

(2) Hemi piah lam ah hian zirtirtute hi duh ang anga lak theih anih loh avangin zirlai duh ang ang (admit) hi thil tih theih a ni lo tlat bawk a ni. Zirlaite beidawng lova admission an hmuh theihna hmun lama a rang lama intifel a thawveng tak leh tluang taka zirna an chhunzawm hi Mizoram Sawrkar chuan a duhsak tak meuhva. MZP te pawhin Sawrkar tih theih chin (limitation) hrethiam a zirlaite hmakhua thlir tel a lungawi lohna lantir zui lo turin sawrkar chuan a ngen tak meuh a ni.