Vawiin 8.7.2014 khan I&PR Auditorium, Aizawlah Socio-Economic & Caste Census – 2011 neih meka Aizawl khawpui chhunga Ward Level Officers leh Assistants te tan training buatsaih a ni a. Socio-Economic & Caste Census (SECC) hi kum 2011 khan neih a ni tawh a. Tunah hian Draft List hi ni 27.6.2014 khan siamthat a nih theih nan tarchhuah a ni. He training hi Dr. Franklin Laltinkhuma, Aizawl DC in a hmanpui a ni.

Dr. Franklin-a chuan SECC hi chhungkaw tin khawsak dinhmun tarlanna a nih bakah kan state-in Plan Allocation leh Centrally Sponsored Schemes (SSA, RMSA, MGNREGS, NRHM, IAY, etc) hnuaia Central Sorkar atanga kan sum hmuh tur tehfung-ah hman a ni dawn a. Hei bakah hian kan buhfai, gas, etc dawn tur thleng a nghawng dawn a ni. Chuvangin SECC-2011 Draft List hi mipuiten en chiang a, chhungkaw hmaih palh nei miah lova, SECC Final List siam turin sorkar official SECC a inhnamhnawihte, NGO leh mipuite tangho turin a ngen a ni. Kan inchhiar tlem a nih chuan central atangin kan dawn a tlem dawn a ni mai, a ti.

SECC lo neih tawhna Draft List hi mipuite hmuh theihin ni 27.6.2014 khan tarchhuah a ni a. Draft List hi DC Office, BDO Office leh vengtina Designated Officer/LC/VC/YMA te hnenah en theih a ni. Chhiarpui neih lai hian mi engemawzat hmaih palh an awm a. Chuvangin he Draft List-a tihdik loh siam thatna tur te, hmaih palh thun leh na tur leh list-a chuang tlak lo paih ngaite paihna tur form hrang hrang (Claims & Objections forms) a awm a. Hei hi mipuiten ngaihven theuh turin Aizawl District Admininistration in a ngen a ni. Veng tina Local Council/ Village Council leh Branch YMA te pawh ram leh hnam rawngbawlna anga ngaiin Charge Officer leh Ward Level Officer-te tha taka lo tawiawm turin Aizawl District Administration in a sawm a ni. Claims & Objections hi ni 17 July 2014 thleng thehluh theih a ni.

He training ah hian,Dr. Lalnilawma, MZU leh National Level Master Trainer ni bawkte, Pu Rajib Sinha,Census Officer leh Pi Angela Zothanpuii, Addl. DC Aizawl ten training hi an pe a ni.