University Grant Commission (UGC) North Eastern Regional Office (NERO) suma Aizawl West College Building sak thar chu vawiin chawhma dar 11:00 khan Higher & Technical Education Minister Pu Lalsawta’n a hawng.

Minister Pu Lalsawta chuan kalkhawmte hmaa thu sawiin College building neih that chuan zirlaite rilru nghawngin khawvel chona a siamsak thei a ni, a ti a. Hmarchhak state zingah Mizoram chu UGC sum hai chhuak tam pawl a ni tiin Principal leh staff te thawhrimna ah lawmthu a sawi bawk. Zirlai ten thiamna chhawr tlak dik tak an puak chhuah theih nan sorkar chuan zirna tihhmasawn nan a theih ang ang leh remchan ang angin hma a la chho mek a, ram leh hnam tana a tha tur ni-a a hriatah chuan sawiselna karah pawh huai takin a kal zel a ni, a ti. Tunlai khawvel hmasawnna chak tak, inbiakpawhna lamah phei chuan khawvel zim tawh takah hian thiamna dik leh tlo (quality education) hi a pawimawh zual zel dawn a ni, a ti a. Zirna tha neih theih nan khawtlang nun (society) a pawimawh em avangin Mizoram pawh hian society tha kan neih a tul hle a ni, a ti bawk.

Minister tawiawmtu Higher & Technical Education Department Director Dr Zochungnunga pawhin thu sawiin Lengpuia NIT hmun bultan turin October thlaa Union Minister beisei a nih thu leh, Sorkar Laipui Pilot Project hnuaiah Mizoram ah Community College pahnih din tura ruahman a nih thu te a tarlang.

Dawrpui Vengthara Aizawl West College Building hawn thar hi Rs 64.55 lakhs senga sak a ni a, zopa chhiara chhawng nga niin Principal, Vice Principal Office, Teachers Common Room, Library, Exam Committee Room bakah Classroom engemaw zat a awm a ni.

Aizawl West College hi kum 1990 khan zirtirtu 7 leh zirlai 150 neia bul tan niin 1994 ah NEHU-in Degree College ah a hlangkai a, 1995 ah Deficit Grant in Aid ah hlankai ni lehin tun dunhmun ah Government Aizawl West College hian zirlai 700 chuang leh zirtirtu 38 an awm mek a ni.