Vawiin khan Higher & Technical Education Minister Pu R. Romawia chuan Govt. Hrangbana College Freshers Social , Hrangbana College Golden Hall-ah a hmanpui.
Pu R. Romawia chuan Hrangbana College zirlaite chu Freshers Social mahni college Hall tharah ngei in hman theih avangin in vannei ani, a ti a. Mizote chu zirlaiah hma kan sawn zel thu sawiin NEET exam-ah te pawh zirlai thahnem tak an tling thin chu lawmawm a tih thu a sawi bawk a. Higher & Technical Education Minister chuan tunhnaia UG result chhuaka HBC (Hrangbana College) in result tha tak an nei chu a lawmpui thu leh zirlaite thawhrimna, zirtirtute thahnemngaihna leh tanrualna vang a ni, a ti a. Zir san zelin hriatzau leh zir belh tur tamzia kan hrechhuak ani tiin zirlaite chu thahnemngaihna rilru nen zir chho zel turin a fuih a. Pu R Romawia chuan zirlaite chu potential tha tak an neih te haichhuaka tipungin an College leh an ram ti hmingthatu ni tura penchhuak zel turin a fuih bawk a ni.
Govt. Hrangbana College hi July ni 21, 1980 a din niin tun dinhmunah zirlai 1750 an awm a, department 10 a awm bawk a ni. UG result 2017-ah khan, HBC atang hian topper 2 awmin, department hrang hrang atangin top 10 lang pha 38 an awm a, first division a pass zirlai 250 an awm bawk a ni.
Fresher's Social-ah hian Higher & Technical Education Minister chuan Govt Hrangbana College magazine a tlangzarh a. He hunah hian Hrangbana College atanga zirlai titha ber Dominic Vanlalruata (Commerce) hnenah R.Zatlaia Academic Excellence Award cheng singkhat leh certificate hlan niin Top 10-a lang pha zirlai 38 te hnenah Hrangbana Award cheng 1000 leh certificate hlan bawk a ni. Hei bakah hian SSU Zirlai mahni intodelh chawimawina zirlai pathum: F.Lalhmingliani, Vanlalfakzuala leh C. Lalramlianmawia te hnenah an hlan nghal bawk a ni.
