No.7794/2020-2021

Dated Lunglei, the 15th March, 2021: Higher & Technical Education (H&TE) Minister Dr R.Lalthangliana chuan vawiin chawhma khan cheng nuai 131 (RUSA 2.0 sum cheng nuai 100 leh SEDP sum cheng nuai 31) senga sak Lunglei Government College (LGC) Library Building thar a hawng.

Hawnna inkhawm hi Pu R.Lallianzuala, Jt. Director, H&TE in kaihruaiin Lunglei DC Pu Kulothungan A, Lunglei SP Pu Rex Zarzoliana Vanchhawng leh Lunglei District sawrkar official-te, LGC hnathawktute, media mite, party hruaitute leh sawm bik dangte an tel a ni.

H&TE Minister Dr. R. Lalthangliana chuan RUSA leh SEDP sum kaltlanga LGC Library Building changtlung tak a ding ta chu ropui a tih thu sawiin zirlaite leh zirtirtu ten tangkai taka an hman theih nan duhsakna a hlan a. Lunglei Goverment College chuan hmasawnna ruhrel (college infrastructure) leh zirna lamah te kawng hrang hranga hma an sawn chu lawmawm a tih thu sawiin heng infrastructure te hian zirna leh college hmalakna hrang hrangah hmasawnna tam tak a thlen ngei a beisei thu a sawi. Zirlai kalkhawmte hnenah fuihna thu sawiin Higher & Technical Education Minister chuan an zirlai ngai pawimawh hmasa ber tur leh tum mumal nei a, chhungkua, khawtlang leh ram tana chhawr tlak nih tum turin a chah a ni. College ten sawrkar laipui atanga RUSA funding dawng zel turin National Assessment and Accreditation Council (NAAC) endikna hlawhtling taka an hmachhawn thin a tul thu sawiin Mizorama college zawng zawngte hemi kawnga tha thlah lova tan la reng tura a duh thu H&TE Minister chuan a sawi a ni.

A Department chan dang Health & Family Welfare Department chungchang pawh sawiin Dr. R. Lalthangliana chuan Mizoram chu Covid-19 do kawngah India rama thawk tha berte zing ami kan nih thu leh tun dinhmunah Covid-19 vanga nunna chan tlem berna state kan nih thu sawiin hei hi Department thawktute, LTF-te, kohhran leh Mizoram mipui tan hona rah a ni a tiin an chungah lawmthu a sawi a. Mizorama Cancer Superspeciality Hospital din turin JICA kaltlanga hmalak mek anih thu sawiin Health Minister chuan health infrastructure changtlung tak nei tur leh health education lama hmasawn zel turin Department chuan theihtawp a chhuah thu a sawi a. Commmerce & Industries Department chungchang pawh sawiin Minister chuan Bangladesh nena insumdawn tawnna ti hlawhtling thuai tura hmalakna a kal mek thu leh hemi chungchang bawhzui zel turin tun kar Friday (19th March 2021) hian Bangladesh sawrkar laipui mi pawimawhte hmu tura Dhaka kala tum thu a sawi a ni.

Er Joshua Lalthakima, AE, RUSA, H&TE chuan Technical report pein LGC Library building thar chu RUSA 2.0 sum cheng nuai 100 leh SEDP sum cheng nuai 31 sengin September 2019 khan Sky Ridge Engineering, Aizawl ten an sak tan thu a report a. Library Building hi Floor hnih a ruahman niin a dung zawng 61 feet leh a vang zawng 41 feet a ni.

Lunglei Government College (LGC) hi September 10, 1964 a din niin Principal hmasa ber chu Rev Dr CL Hminga a ni a. Tun dinhmunah zirlai 1029 (BA- 822 leh BSc - 207) awmin zirtirtu 67 (regular - 44) awmin zirna discipline 14 (Arts – 8 leh Science – 6) a awm a ni. LGC chuan National Assessment and Accreditation Council (NAAC) chu kum 2017 ah hmachhawnin Grade B++ an nei mek a ni.