No.7795/2020-2021

Aizawl, 15th March, 2021:  Parliament Budget Session hmanga Delhia awm mek Rajya Sabha MP Pu K.Vanlalvena chuan vawiin khan India Vice President, leh Rajya Sabha Chairman ni bawk Pu M.Venkaiah Naidu chu a chenna hmunah kawmin Myanmar rama Democracy tundin tuma hmala tute chunga tawrhna nasa tak thleng mêk chungchang leh Mizoram mamawh thil pawimawh dangte a sawi pui.

Pu Vena hi MNF Adviser Pu Rosangzuala'n a tawiawm a. Myanmar ram buaina avanga sipai kut tuara thi leh hliam tam tak an awm tawh thu leh, mi tam tak jaila khung an nih mek thute, he buaina avanga thi leh hliam zat dik tak hriat theih a nih loh thu leh an la pun belh zel dawn nia a lan thute Vice President hi hrilhin Myanmar sipai leh police te zinga mi eng emaw zat chuan Myanmar mipuite chunga kutthlak an duh loh avangin an ralthuamte surrender in civilian midang eng emaw zat te nen inhumhimna zawngin Mizoramah an rawn tlan lut tawh a ni tih an hrilh a.

Heng Myanmar atanga raltlan lo lutte chhawmdawlna tur ngaihtuah a tul thu pawh thlenin Myanmar mipuite chunga tawrhna titawp tura a tul dan anga hma la turin India Vice President chu an ngen a. Myanmar laka sawrkar laipui policy chu ennawn tula an hriat thu an thlen bawk a ni.

Pu Vena leh Pu Rosangzuala te chuan India independent hnuah Union Public Service Commission member ah Mizoram mi pakhat mah an la awm ngai loh avangin UPSC ah Mizo dah ve tura hma lak pui turin Vice President chu an ngen a. State puitling nih hnu kim 35 ah pawh Mizoram chu All India Civil Service ah AGMUT cadre hnuaia a la awm chu a hun tawh lovin Mizoram Cadre hran siam a hun tawh tih Vice President hnenah hian an thlen a. Staff Selection Commission hnuaia hna dil tu ten Guwahati ah kher exam ngai tawh lova  Aizawla exam centre dah a nih theihna tur pawh ngaihtuah pui turin Vice President Pu M.Venkaiah Naidu chu an ngen a ni.