No.7796/2020-2021 

Mamit 15th March, 2021 : Vawiin khan I&PR Conference Hall, Mamit-ah Mamit District Consumer's Organization buatsaihin World Consumer Rights Day, 2021 hman a ni a. Pu R. Vanlalsawta, Addl.DC, Mamit chuan khuallian niin he hun hi a hmanpui.

Khuallian chuan World Consumer Rights Day hmang tura kalkhawm mipuite chungah lawmthu sawiin mitinin dikna chanvo kan nei a, kan dikna chanvo chu kan humhalh ve a ngai a ni a ti. Kumin World Consumer Rights Day thupui "Tackling Plastic Pollution" tih chu sawifiahin Plastic hman that lohna hrang hrang a tarlang a. Plastic chu tawihral mai thei lo, tawihral tur pawha kum tam tak hun duh anih avangin ram changkang zawkte chuan a aiawh thil dang an hmang uar tawh zawk a. Kan ram pawhin zawi zawiin Plastic hman kan bansan ve hret hret a, tun dinhmunah kan hmang lo thei hrih lo anih pawhin loh theih loh tak takah chiah hmang turin kalkhawmte chu a chah a. Mamit chuan khawtlang hruaitu tha tak tak an neih thu sawiin Plastic hmang lo tur leh hmang tlem tura inzirtirna pawh tun aia uar zawka kan kalpui a duh thu a sawi bawk.

He hunah hian Pu H. Lalramliana, Vice President, Mamit District Consumer Organization chuan Consumer awmzia leh Consumer-te hriat tur dan pawimawh hrang hrangte kalkhawmte hnena hrilhhriatna a nei a. Consumer kan nih angin kan thil lei leh kan bill chawi chungchangah lungawi lohna kan nei anih chuan kan lungawi lohna te thlen nachang hre thin turin kalkhawmte a chah nghal bawk.

Mamit-a World Consumer Rights Day hmanna hun hi Pu FL. Rinngheta, President, MDCO Mamit chuan a kaihruai a. Pu James Laldawngliana, Asst. Leader, St. Francis of Assisi Church, Mamit chuan hunserh hmangin Pu Hmingthanthuama, Fin. Secy. MDCO Mamit chuan kalkhawmte hnena lawmthu sawina a nei a ni.

He hunah hian kalkhawmte atangin zawhna leh chhanna hun tha tak hmanho anih bakah sawihona neih zui a ni a. Jt. VC awiawh, Sub. Hqrs. YMA hruaitute, MHIP leh MUP hruaitute, Zirtirtu aiawh, Mamit khawpui chhunga Retailer, FCS&CA Department aiawhte bakah thutharthehdarhtute an tel a ni.