Vawiin khan Higher & Technical Education Minister Pu R. Romawia chuan Parliamentary Secretary Pu H. Zothangliana nen Directorate of Higher & Technical Education Department chu tlawhin, thawktute nen inkawmhona hun an hmang.

Minister Pu R. Romawia chuan tunlai khawvelah higher and technical education-in hmun pawimawh a luah tulh tulh a ni a ti a. Mihringa thiamna leh theihna inphumru haichhuah hi hna pawimawh tak, tunlai khawvel thang zel umphak theihna kawng khat ani tiin, helama hma kan sawn loh chuan ram a thang tak tak thei dawnlo a ni, a ti. Heng thiamna leh theihnate (human resource) tithang tur hian Higher & Technical Education Department a thawktute chu an hna ah theihtawp chhuah turin Minister hian a fuih a. Central Service-a Mizo tam zawk an luh theih nan coaching pawh awmze nei tak a kalpui zel dan ngaihven a, sum awm dan azira hmalakna dang hrang hrangah pawh puih zel a tiam bawk.

Parliamentary Secretary Pu H. Zothangliana pawhin thu sawiin, Department in hma a sawn zel theih nan langtlang tak leh inpawh taka Minister leh amah ngei pawh bengvar thin turin a chah a. Hmalakna hrang hrangte chu chawp leh chilhin hlawhtling vek theilo mahse hun rei ah chuan rah tha tak an hmuh ngei theihnan theihtawp chhuah an inhuam thu a sawi bawk a. Chutihrual chuan Department thawktute pawh an hna ah rinawm taka thawk a, file kal lai te tikhawtlai lo turin Parliamentary Secretary hian a chah bawk.

He inkawmna hun hi Higher & Technical Education Director Dr. L. N. Tluangi’n a kaihruai a. Hnathawktuten an hmalakna hrang hrangte sawihona hun an nei a ni.