Ni 20 awh Hindi Orientation Course  vawi 152-na chu DIET, Aizawlah vawiin chhun khan khar a ni a.  Kharna inkhawmah hian Higher & Technical Education Minister Pu R.Romawia chu khuallian a ni.

Pu R.Romawia chuan Hindi chu India rama cheng kan nih avangin thiam a pawimawh a, zirtirtu thawk mek leh zirtirtu ni tura inbuatsaih DIET trainees-te tana Hindi zirna buatsaih chu zirlai naupangte tan a tangkai ngei a beisei thu a sawi . Tawng thiam chu khawi hmunah pawh an tlang nel a, mi zah an kai bik tiin Hindi thiamte an vannei hle a, ram chhung hmun danga an zinchhuahin awlsamna tam tak a siamsak bakah hnam dang zingah an tlangtla bik, a ti a. India mi kan nihna avang te, ram inpumkhat nan te leh hnam dangte zinga Pathian thu hril nan thlenga tangkai a nih avangin Hindi kan ngai pawimawh tur a ni, H&TE Minister chuan a ti.

20 Days Hindi Orientation Course hi DIET, Aizawl leh Central Institute of Hindi (CIH), Shillong Regional Centre tangkawp buatsaih a ni a, Preservice Teacher Eduation zirlaite pualin DIET Aizawlah kum 2006 atang khan neih tan a ni. Orientation Course a kalte hi Agra-ah 20 Days Hindi Refresher Course neihpui leh thin an ni a, senso zawng zawng hi CIH, Agra in a tum vek a ni. CIH, Shillong Regional Centre atang hian Regional Director Dr.Bijendra Singh a lo kal a ni.

DIET, Aizawlah hian faculty 28 leh office staff 30 an awm mek a. Kum 1953 a din a nih atangin Middle School zirtirtu 2344, Primary School zirtirtu 3269, Preservice Teachers 971 an train chhuak tawh a ni.

Hindi Orientation Course  vawi 152-na kharna inkhawm hi DIET, Aizawl Principal Pu Lalnuntluanga Hnamte chuan a kaihruai a. Hindi Propagation & Training DIET (A) Chairman leh Senior Lecturer ni bawk Lalengzama Lianhna chuan training report a pe a.  CHI, Shillong Regional Director Dr. Bijendra Singh leh School Education Directorate-a Hindi Education Officer Dr.C.Lalrampana ten thu an sawi. Zirlai titha pakhatna atanga pathumna hnenah khuallian hian lawmman a hlan bawk a ni.