Vawiin chawhma dar 10:30Am khan D.C. Office kawt-ah UD&PA, Siaha Office huaihawt ‘Poverty Free India-2022’ NULM Rally neih a ni. He rally-ah hian UD&PA Official te leh NULM kaltlanga tanpuina dawng Self- Help Group Member thahnem tak an tel.

NULM  Rally kaihruaitu Pu Alexander Lalrempuia, PM, Siaha chuan thu sawiin,  New India Movement 2017 - 2022 kalkhawmte hnenah a hrilfiah a, kum 2022-ah India rama mirethei an awm tawh loh nan leh India ram hmel thar siam turin he movement hi Sawrkar Laipuiin a buatsaih a ni, a ti.

He rally hi Pu Elson Eliasa Nôtlia chuan kaihruaiin, kalkhawmte chuan New India Movement thutiam (Pledge) an sawiho a. “India ram chu ram fai tak, retheihna awm tawh lohna, eirukna awm tawh lohna, hel pawl awm tawh lohna, chi bing inthliarna awm tawh lohna, hnam bil inthliarna awm tawh lohna leh ram nuam tak leh ropui taka siam a nih theih nan kalkhawmten thu intiamna neiin, rally an nei nghal bawk a ni.

NULM hi Ministry of Housing and Urban Poverty Alleviation hnuaia Sawrkar Laipui Flagship Programme pawimawh tak pakhat a ni a. He Mission-in a tum ber chu a bulthuta Miretheite Inzawmkhawm Pawl (Self-Help Group) chak leh ngelnghet tak din a, chumi kaltlanga khawpui retheihna tihtlem a, mirethei chhungkuate tana eizawnna tur hlawkzawk hmuhpui a, eizawnna ngelnghet an neih theihna tura kawng kawhmuh hi a ni.

Vawiin NULM Rally kaihruaitu Pu Alexander chuan UD&PA hnuaiah kumin September thla-ah Skills Training  buatsaih a ni dawn a, dilna form hi vawiin tahrik 18.8.2017 atanga 25.8.2017 thleng UD&PA Office-ah lak a thehluh theih a ni ang, a ti a. Kalkhawmte chu he Skills Training ah hian tel tum theuh turin a chah bawk a ni.