Vawiin chawhma dar 11:00Am khan Siaha District hmeichhiate tan M.CH.P (Mara Chanô Py) Headquaters te chuan I&PR Conference Hall, Siaha-ah “ Seminar on Consumers’ Right ” tih thupui hmangin Seminar an buatsaih. He hun hi Pi. P. Chaki, President M.CH.P (Hqrs) chuan kaihruaiin, Resource Person atan Dr. HTC. Lalrinchhana, Judge, Fast Track Court, Siaha District, Siaha chu hman a ni.

Vawiin Seminar Programme-ah hian College Vaih, M.CH.P  Branch te chuan Opening Song sa in, Pi H. Zoramthangi, Principal, Lorrain English School leh E.C.M. Grace Children Home, Chairman ni bawk chuan Devotion hun a hmang.

Resource Person Dr. HTC. Lalrinchhana chuan thla hmasa July thla khan District Consumers’ Forum-ah sawrkarin President-a an lo ruat thu sawiin, Civil Supply & Consumers’ Affairs Department in District Consumers’ Forum Member tur mi pahnih an lo ruatfel hunah chak takin District Consumers’ Forum hi an kalpui tawh tur thu  sawichhuak in, thubuai thehluh reng reng chu rang takin bawhzui zel a ni tur thu leh thubuai neihte chuan District Forum hnenah inthlahrung lovin rang taka thlen zel turin a chah hlawm a ni. District Consumers’ Forum hmang hian Siaha District-a Consumer-te dikna chu chawinun tlat a ni tawh ang, a ti.

He Seminar-ah hian Dr. HTC. Lalrinchhana chuan kalkhawmte hnenah Power Point Presentation hmangin zirtirna hun a hman bakah, zawhna leh chhanna hun te hman a ni a. Hmeichhe Seminar chhima kalkhawmte zawhna hrang hrang te chu Resource Person hian a chhang bawk a ni.

Vawiin seminar programme hi Pi. B. Ngiasô, General Secretary, M.CH.P (H) chuan lawmthu sawina hun  hmang in he hun hi a ti tawp a ni.