Vawiin khan Mizoram Legislative Assembly Speaker Pu R. Romawia chuan MSACS buatsaih HIV/AIDS Seminar, Bawngkawnah a hmanpui.

Speaker chuan khawvelah natna chi hrang hrang a lo chhuak zel a, a dotu ten do rem tumin theihtawpin hma an la a, kan ramah pawh zenghri natna te pawh umbo a lo ni tawh a ni, a ti a. Chutihlaiin natna thar, khawvelin a la hmelhriat ngailoh te a lo chhuak a, tun dinhmunah HIV/AIDS hi min tibuaitu, nasa taka mihring te suattu, khawvel leh Mizoram pawhin nasa taka a buaipui a ni, a ti. Mizoramah chuan mipat hmeichhiatna avangin AIDS a darh nasa ber a, khawtlang nun zalen tak, mipa leh hmeichhiate  zalen taka kan inkawm dual dual theihna hmunah hian fimkhur taka nun hman a pawimawh  a ni tiin sorkar leh tlawmngaipawl thenkhat tangrualin Awareness campaign an buatsaih thin hi a hlawkthlak hle a ni, a ti bawk.

MSACS in an chhinchhiah danin kumin July thleng khan thisen test tawh zat mi 1,58,220 zingah HIV positive mi 6014 hmuhchhuah an ni a, AIDS vanga thi 228 an awm tawh. Kumin July thla chhung ringawt khan HIV positive 118 hmuhchhuah niin HIV positive zingah hian 70% dawn lai chu mipat hmeichhiat hman khawloh vanga kai an ni. Drugs Addict inchiu thin te, KS (Female Sex Workers) leh MSM (mahni mipatpui ngaizawng) te zingah HIV hrik kai a hlauhawm bik a, sorkar leh tlawmngaipawl thenkhatin Targetted Intervention hmangin enkawlna tha tak an pe a ni.

Vawiin HIV/AIDS Awareness Campaign, Bawngkawn YMA Zawlbuka neihah hian Bawngkawn venga tlawmngaipawl hrang hrang YMA, MHIP, Bawngkawn Bazar Welfare, Local Council hruaitute leh kohhran hruaitute sawm  an nih angin an tel tha hle. MSACS Project Director Dr. Eric Zomawia leh Jt. Director (TI) Pi Betty Lalthantluangi ten he hunah hian zirtirna an pe a, sawihona hlawk tak an nei zui nghal a ni.