Mizoram Range Assam Rifles, 23 Sector Assam Rifles tih a hriat bawk chuan an Raising day vawi-51 na chu September ni 10 khan an lawm a. Mizoram Range/23 Sector hi September ni 10, 1960 khan Silchar a din niin Col. J D Nadirshaw VRC SC chu Deputy Inspector General (DIG) hmasa ber a ni a. A din tir ah chuan Sector hnuaia Unit te chu Mizoram, Manipur leh Tripura ah te dah an ni a.Kum 1962 China nena Indona ah khan Range hi Mokokchung Nagaland a dah a ni a; 1966 Mizoram buai khan Mizoram a dah an nih leh a. Mizoram UT a nih khan Range Headquarters chu Lunglawn Lunglei a sawn a ni a. September ni 15, 1978 khan tuna an awmna hmun Khatla-ah hian an in sawn nghet ta a ni.

Mizoram Range leh a hnuaia Battalion te chuan Myanmar nena kan ramri venhim hna an thawk ber a. Tlang mite thian tih Assam Rifles thupui chu a taka lantir nan an hnathawhah te hian Mizoram leh Mizo mipui te hmasawnna ngaihtuah chungin hna an thawk fo thin a ni.