"Hnam changkang zawkte hnathawh nasat zia ngaihtuah lovin, an hnathawh rah tlana hlim taka an nawmchen lai chauh kan entawn thin hian zir tur kan la ngah hle tih a tilang," tiin FCS&CA, Transport, etc. Minister Pu John Rotluangliana chuan vawiin MZI Lengpui branch 14th Rising Day lawmna a hmanpuina ah a sawi a. Hla leh zai hian thinlung a hneh thei em avangin, Mizo hnam thinlung a tha zawnga hneh turin MZI chuan hmang se a duh thu a sawi bawk.

Minister chuan ram dangte nen inkhaikhin chuan kan hnam chu naupang hle mahse hun reilote ah kan thang chak hle a. Kalsan pawimawh tak tak kan nei mai ang tih pawh a rin theih a. Thawklo a ei tumna te, hnathawh ngamloh chin leh zah chin kan nei tlat hian kan rilru put hmang dik lohzia a tilang a ni, a ti a. TV leh Internet kaltlanga ram changkang zawkte hmasawnna kan hmuh vangin kan rual awt a. Amaherawhchu anni chuan kum tam tak hmasawnna hna lo kalpui tawhin, rim taka hna an thawhna te kan ngaihtuah thleng leh silo thin a ni, a ti a. Chuvang chuan kan hnam hi changkanna leh hmasawnna kawng dik a hlang tur chuan thalaite an pawimawh a ni, a ti bawk.

Yoga chungchang sawiin Pu John Rotluangliana chuan Hindu sakhuana nena inzawm tlat, zawi zawina kan rinna tihdal tumna hmanrua a nih avangin Mizo Kristiante tan tih ve chi a ni lo, a ti a. Social media kan hman danah pawh fimkhur a tul thu leh, a chhia leh diklo lam nilova thu tha leh chanchin pawimawh thehdarhna tangkai tak ni zawk se a tih thu a tarlang bawk.

MZI Lengpui Branch hi kum 2002 khan din tan niin, member 200 chuang an awm tawh a. Vawiin hun, RL Picnic Spot, Lengpui a neihah hian MZI General Hqrs. atang leh Lengpui khawtlang hruaitute leh Tlawmngai pawl hrang hrang aiawhte an tel bawk a ni.