Vawiin chawhma dar 9:30 khan Khawzawla a vawikhatna turin Khawzawl R.D. Department, 2nd. IR Battalion, Khawzawl Police Station leh Khawzawl Higher Secondary School tangkawpte chuan Khawzawl HSS-ah chhiatrupna thlen thulh a chet lak dan tur, lemchan hmanga inzirtirna, Mock Drill buatsaih.

Khawzawl HSS-a Mock Drill hi Khawzawl SDO (Civil) Pu Lalrinzuala, MCS, BDO Charge latu ni bawk leh KHSS Principal Pu Joseph Zonunmawia ten an telpui a. He hunah hian 2nd. I.R. Police-a State Disaster Response Force-te leh a bika Training lo nei tawhte chuan zirlaite chu chhiatrupna thlen thulh a vanduaina thleng thei laka a theih anga inven dan turte, hliam tuar leh vanduaina tawk te chhanchhuah dan turte, damlo hliam tuarte rang taka enkawl leh buaipui dan turte an zirtir a. Zirlaite hian an thil zirte hi a taka ti chhinin hriatfiah loh an neihte pawh kimchang takin inhrilhfiah nghal an ni.

Inzirtirna hun an hman zawh hian Khawzawl HSS a zirlaite leh zirtirtute nen, State Disaster Response Force Member-te kaihhruaina in chhiatrupna thlen thulh a chet lak dan tur hi a tak ang thei ber turin lemchan a ni a, hei hi KHSS zirlaite leh zirtirtute chuan an hlawkpui thu an sawiin, Khawzawlah huap zau zawka Mock Drill hi buatsaih turin an ngen bawk.

Attachment

  • Loading attachment...