Mualkhang Village Council te leh Railways Contractor (UCM) te inkar a inhriatthiam lohna awm chingfel turin Kolasib DC hovin a pisa ah tukin zing dar 10:30 khan Kawnpui V/C, Khamrang V/C leh Mualkhang V/C ten meeting pawimawh tak an nei.

Railway contractor te hnenah pawisa lo dil an awm thin ni a hriat a ni a. A bikin tunhnaiah Mualkhang ah railway contractor te pawisa lo dil an awm niin a lang a. DC Chamber ah hian Deputy Commissioner, Magistrate leh Village Council te thukhawm chuan an harsatna sawihovin V/C te pawh in an khawchhunga thilthleng chu pawi an tih thu leh hetiang thil a thlen tawh lohna tura hma an lak tur thu an sawi a, Railway company hnathawh ti thuanawp lo tur zawng a mipui te in hrilhhriat dan tur an ngaihtuah ho nghal a ni.

Meeting chuan tun hnu ah khawtlang hruaitu ten railway hnathawk te hnen atangin donation lo khawn emaw khawtlang mamawh lo thlen te chu tih tawh loh nise an ti a. Harsatna a awm a nih chuan District Administration ah thlen zel thin tur leh thawhhona tha tak hnuaia hna tluang taka a kal zel a, rail a lo luh thuai theih nan khawtlang leh mitin ten mawhphurhna lian tak an neih thu meeting ah hian tarlang a ni.