Vawiin khan Chief Minister Pu Lal Thanhawla chu a Pisa-ah Pu H.K. Jaggi, General Manager, Northeast Frontier Railways (Construction) leh Northeast Frontier Railways (Construction) hnuaia hotu 4 te chuan hmuin Bairabi atanga Sairang thleng tur Rel kawng siam mek chungchanga an hnathawh chin, an hma bak leh an harsatna te hrilhin inkawmna hun tha tak an nei.

Chief Minister Pu Lal Thanhawla chuan an hnathawh chak dan te a hun an bituk angin an thleng em tih a zawh chu Pu H.K.Jaggi chuan tlang ramah chuan lui kan leh leiverh a ngaih avangin rel kawng sialna kawngah chona tam tak a awm thu sawiin tun dinhmunah chuan an hnathawh dan chu an hun ruat angin a la kal zel thu a hrilh a. He Project hi March 2019 a zawh tura ruahman a ni chungin engtin nge tun aia chak zawka hna an thawh ang tih an ngaihtuah ho reng thu a sawi bawk. State sawrkarin kawng engkima tha taka an tawiawm zel avangin Chief Minister hnenah lawmthu a sawi a, hun remchanga Bairabi atanga Sairang rel kawng sial mek hnathawhna hmun hrang hrangte a hmuna tlawh turin an sawm a ni.

Chief Minister chuan Mizoram chu tlangram leh India state kilkhawr berte zing ami anih avangin India hmun dangte angin hnathawh a awlai lova, fur ruahtui a tam vangin kum khatah thla 5/6 vel lek hnathawhna hun (working season) a awm a, chu mai bakah hnathawhna bungrua te state pawnlam atanga thiarluh vel a ngaih avangin project man a to thin a, hei hi Delhi a project sanction tu te hian an hrethiam lo fo thin a tiin an hmun hma te hrethiam tur chuan an tlawh ngei a ngai a ni, a ti.

Railways hotuten Sairanga rel station sak turah Mizoram leh Mizo te ziarang te pholan an duh thu an sawi chu Chief Minister chuan tha tiin Transport Department Consultant Pu Hrangtawna he meeting a tel ve chu hemi atana a theih ang anga hma la turin a hrilh a ni.

Tun fur ah khan Silchar leh Lumding inkar rel kawng lian chu hmun tam takah lei a tawlh avangin thla khat leh a chanve deuh thaw khar a ni a. Mizoram rel kawng sial mekah slope awmte chu hetiang a thlen loh nan a bika thuam ani dawn tih Railways hotute hian an sawi. Silchar-Lumding rel kawng chu kar hnih khat velah hawn an beisei thu an sawi bawk. Sairang Rel Station bulah Transport Hub, Kudam lian leh cold storage te din a pawimawh thu an tarlang bawk.

Northeast Frontier Railways (Construction) hotu dang an General Manager tawiawmtu te chu - Pu A.S. Garud, Chief Administrative Officer; Pu A.K. Yadav Chief Engineer leh Pu Hari Singh leh Pu S.P. Deshmukh, Deputy Chief Engineer ve ve te an ni.

Attachment

  • Loading attachment...