Vawiin chawhnu dar 2 khan District Task Force for Immunization chu Lunglei DC Pu Abhijit Vijay Chaudhari, IAS kaihhruaiin a Office Chamber-ah an thukhawm a. Lunglei District-a Mission Indradhanush kalpui mek dan leh kalpui zel a nih dan tur te an sawi ho.

District Immunization Officer Dr. Lalparliani chuan Bunghmun Primary Health Centre hnuaia Bunghmun leh Laisawral Sub-Centre ah Mission Indradhanush Phase 3, Round 3 kalpui a nih thu a tarlang a. He round-ah hian naupang kumhnih tlinglo 123 leh nu nau pai 15 hnenah hri danna vaccine pek tum niin naupang 90 leh nu nau pai 18 hnenah chauh pek theih an nih thu a tarlang a. Kalkawng thalo, mihring indaih lohna, awareness that tawk loh leh thil dang avangin an tum atanga 73% chauh an ti hlawhtling thei a ni a ti. Dr. Lalparliani chuan Bunghmun PHC vek a Phase 3 Round 4, July 2016 atanga kalpui an tum thu leh inpuahchahna an neih dan a sawi.

Mission Indradhanush hi December ni 25, 2014 khan hawn a ni a. Mizoramah April ni 7, 2015 atang khan Lunglei, Mamit, Lawngtlai leh Siaha District-ah te kalpui tura tih a ni. Mission hi Lunglei District-ah kalpui a nih atanga Phase 3 Round 3 thleng hian naupang kumhnih tlinglo 1617-ten vaccine la tawh in, naupang 222-ten vaccine an la kim tawh a ni.