Vawiin chawhma ah khan Raj Bhavan ah North East Frontier Railways hotute chuan Mizoram Governor Lt Gen Nirbhay Sharma (Retd) hmu in Bairabi leh Sairang inkar rel kawng phah mek an thawh dan an hrilh.

NFR hotute chuan Kum 2019 ah Rel kawngin Sairang a rawn thlen theih nan theihtawp an chhuah mek thu leh an hnathawh a chak zual nan theih tawp chhuah puiah Governor Lt Gen Nirbhay Sharma (Retd) chu an sawm a. Governor chuan Mizoram mipui hmasawnna atana thil pawimawh ber pakhat a nih avangin Mizoram sawrkar in a Railways hmalakna chu theih tawp a thlawp a tum tih NFR hotute chu a lo hrilh a. Rail station an siam dan ah erawh ram hmelhmang mil zawng, ramngaw ti chereu lo zawng leh Mizo te rilrem zawng ngaituah tel tur in a chah. Bairabi leh Sairang inkara rel kawng phah hna thawktu contractor te chu company hrang hrang an nih angin tute mah innghah khawtlai tir lova an hna te thawh tir theih nia a hriat thu Governor chuan a inleng te a kawmna ah hian a sawichhuak a. Mizoram tan rel kawng tangkaina leh rel kawng vanga Mizoram in hlawkna a hmuh hun tur chu Rel in Sairang a thlen hunah chiah a lo awm ang tiin Pu H.K.Jaggi, General Manager, NF Railway (Construction) chu a hnuai a hnathawk te tur hmanhmawh turin Mizoram mipui in an beisei tih a hrilh a ni.

Railway hotute leh Governor inkawmna ah hian Mizoram aiawh official ten Bairabi Rel station ah Mizoram quota buhfai hlanthlak chungchanga harsatna an neih chungchang an sawichhuak a. Governor ngenna angin railway hotute chuan chinfel a nih tur thu sawiin Buhfai hlan thlakna hmun chu fur khat a ral hnuah concrete a siam a nih tur thu an tarlang. Hmarchhak bial chhunga rel kawng siam chungchanga hotulu Pu H.K.Jaggi, General Manager, NF Railway (Construction) chuan rel kawng phah hna thawh a chak leh zual nan National highway 54 chhe lai tlem a zawng siam that ni se a duh thu sawiin tun thleng a harsatna liantham sawi tur awm lova hna an thawh theih chungchangah sawrkar leh mipui chungah an lawmthu a sawi a ni. Governor leh State official te rawtna angin sawrkar hnuai an nih vang a Corporate Social Responsibility(CSR) pe chhuak thei lo ni mahse, sikul tha, hospital leh thildang, khawtual mi ten railway a hnathawkte nen an intawm theih ang chi ngaihtuah erawh an tum thu a tarlang a ni.

NFR Chief Engineer Pu AK Yadav in NFR(Construction) in Bairabi leh Sairang inkar a rel kawng siam hna an thawh dan te a hlimthla nen hrilhfiahna in – Rel station pahnih te inkara relkawng phah tur hi 51.30 Km a thui ni a, he rel kawng a lei verh tur leh lei dawh ngai zawng zawng te belhkhawm chu 16.365 km zet a tling a ni. He rel kawngah hian lei verh tlang tur hmun 23 ah awm in lei dawh tur hmun 44 ah a awm a. Leiverh(tunnel) hautak deuh hmun pakhat siam na turin Rs.27lakhs sen a nih thu tarlan a ni a, lei dawh sei ngai lai ber chu 1.11 km ni in Lei dawh tur zinga sang ber chu 117 metres a ni. NFR(construction) estimate ang chuan Bairabi atanga Sairang Rel station inkar a rel kawng chu kum 2019 March thla chhunga phah zawh fel hman tum a ni. Kum 2017 sawrkar kum chhungin Kawnpui Rel station phah thlen tum a nih tur pawh tarlan ni in Sairang leh Bairabi Rel station inkar ah hian Hortoki, Kawnpui leh Mualkhang ah te Rel station hi siam tum a ni.

Meeting ah hian North East Frontier Railways hotute hi an hotupa Pu H.K.Jaggi, General Manager, NF Railway (Construction) chuan rawnkaihruai in NFR official dang te chu Pu AS Garud, Chief Administrative Officer , Pu AK Yadav, Chief Engineer , Pu SP Deshmukh, Dy. Chief Engineer leh Pu Hrangtawna, IRS, Consultant Railways an ni a. An ni bakah Mizoram sawrkar aiawh in Pu Zothankhuma, IAS, Secy, Revenue leh Dr.Franklin Laltinkhuma, IAS, Secy., Transport te an tel a.