Zawlbuk Group YMA bultumin nimin khan Thingsulthliah Playground ah Remna Ni vawi 30-na (Pearl Jubilee) urhsun taka hman a ni a, Home Minister Pu R. Lalzirliana chuan khuallian niin he hun hi a hmanpui a, Zawlbuk Group YMA huamchhunga YMA branch hrang hrang bakah Village Council hrang hrang te, Tlawmngai Pawl te an tel.

Khuallian Pu R. Lalzirliana chuan Remna Ni thuchah sawiin kum 30 lai remna leh muanna nei a kan awm tak hnu hian ram buai lai boruak hre phalo thangthar tam tak an awm ta a, remna leh muanna hlut zia hi kan hrethiam lo palh ang tih ka hlau takzet a ni a ti a, nu leh pa leh rual u zawk ten kan tu leh fa te hnenah remna leh muanna hlut zia hi hrilh tam ila, remna vawng nung reng turin an rilru ah tuhngheh i tum ang u a ti a, Lawngtlaia Remna Ni programme an hmang ve theilo chu pawi a tih thu a sawi bawk.

Home Minister chuan ram buai vanga amah ngeiin a tawhna sawiin an khua Tualbung atang an chhungkua pawh Thingsulthliah ah sawikhawm an ni a, thil rapthlak tak tak leh buaina chi hrang hrang ka tawngin ka mit ngeiin ka hmu a, mizo leh vai, mizo leh mizo kan in that a, a rapthlak zia chu sawifiah thiam chi a nilo a, chutih rualin vawiin a remna kan nei hi a hlut zia sawifiah theih a nilo tiin remna vawn nun chu mizo mipuite tih makmawh "duty" anih thu a sawi bawk. Remna a awm theihna turin mipui mimir bakah tlawmngai pawl hrang hrangte, kohhran hrang hrang ten keimahni theih ang angin hma kan la a, kum 20 ram buai kan nih hnu ah remna kan nei ta a, mi tupawhin "ka tih a ni" ti in sawi se i awih mai ang u, a chhan chu tu pawh hian kan phak tawk tawkah remna kan zawng theuh a, kan dinhmun azirin kan tih theih a in chen lo mai a ni a ti a, pitar/putar chak tawh lo te pawhin thahnemngai takin Pathian hnenah remna a awm theih nan an dil ve tho a, chuvang chuan mi zawng zawngin tha kan thawh theuh a ni a ti bawk.

Remna hi a hlutzia kan hrethiam lovang tih a hlauhawm thu sawiin khuallian chuan zu rui buai leh mi awmherh thenkhat vanga veng leh veng, khua leh khua in epna a thleng thin te hi a pawi em em a, thil diklo ti tu chu hum kher tum lovin dikna i ngaipawimawh hmasa ber thin ila, heng harsatna tam tak hi kan pumpelh thin dawn ani a ti a, kum 30 kalta a zalenna kan hmuh laiin a hnu reilote ah kan ram chhung hmar lama HPC demand area ni ta chinah erawh chuan kum 4 vel chauh remna an chen a, harsatna lehn hriatthiamloh chi hrang hrang an neih avangin ramhnuai lamah mi engemawzat silai nen an bibo a, kum 26 chhung mipuiten hrehawm an tuar tawhin an mangang em em a, remna leh muanna hi hmasawnna bul anih zia leh hlimna bul pakhat anih zia an hriatin mipuite bakah khawtlang hruaitute leh kohhran hruaitute hmalakna in tunah hian remna kawng dap a ni a, tun atanga ni reilote ah Mizoram sawrkar leh hel te an in be dawnna, hlawhtlinna duhawm kan neih theih nan Mizo mipui zawng zawngte tawngtaipuina kan mamawh ani a ti a, Sawrkar chuan mi zawng zawng nen inrem tlang taka awm a duh ber a, thil tha zawk thlenna tur anih chuan a inphahhniam zawka tan pawh a hreh lo a ni a ti bawk.

Zawlbuk Group YMA hnuaiah hian YMA Branch 21 leh Village Council 12 a awm a, vawiin Remna Ni lawmna inkhawm hi Pu PC Lalbiakchama, President, Zawlbuk Group YMA in a kaihruai a, chawhma dar 11:00 ah lawmna inkhawm hi tan niin mipui kalkhawmin "Ro Min Relsak Ang Che" tih hla chu a huhovin an sa a, hemi hnu hian khuallian hian Remna Ni puanzar a pawtpharh a, mipui kalkhawm ten remna vawnghim tura intiamkamna thuchham an sawi rual bawk. Pi Rochuangkimi, BDO, Thingsulthliah in Sawrkar aiawhin Remna thuchah a sawi a, Village Council President zawng zawngin Remna Thuchah an sawi theuh bawk. Vawiin programme ah tho hian Thingsulthliah Diakkawn Veng tlangval India Sipai chhuanawm Havildar Laldinpuia, 8 Assam Regiment chawimawina hlan ani bawk. Havildar Laldinpuia hian nikum August thla khan Kashmir ah Terrorist pahnih a kahhlum avangin India President hnen atang chawimawina "Sena Medal" a lo dawng tawh nghe nghe a ni.