Tuipui-Ral Group YMA huaihawtin nimin khan Khawbungah India sawrkar leh MNF ten remna thuthlung an ziah champha vawi 30-na ropui taka hman a ni. Khawbung Community Hall-a hun buatsaih Remna Ni hmanaah hian Tuipuiral Group YMA huam chhung khaw hrang hrang atangin mi ţhahnem tak an kal khawm a. He hun hi Bialtu MLA, Mizoram Youth Commission Chairman Pu T Sangkunga chuan khuallian niin a hmanpui a, Khawbung RD Block BDO Pu James Lalnithanga chu Khual zahawm a ni.

Khuallian Pu T.Sangkunga chuan Zoram mipuite dilna chhangin Pathianin remna min pe tih sawiin, "Remna hi party hamțhatna atana hman tur a ni lo", a ti a.  Remna puanzâr pawt pharhin Mizoramin Remna leh Muanna a neih theih nan hian Zoram mipui zawng zawngin tha an thawh nia a ngaih thu te, Kohhran leh NGO angte a nasa taka hma lak a nih dan te, khatih hun laia Pu Lal Thanhawla sawrkar Congress leh MNF leh India Sawrkar an inbe rem thei te chu mipuite țawngțaina Pathian chhanna a ni,a  ti a.  Remna hlutzia chu a hunlaia rambuai a taka tawngtute tan a chiang a ni, a ti. Pu T.Sangkunga chuan Mizoram Youth Commission (MYC) hnathawh tlangpuite pawh sawi langin sawrkar hna in lehkhathiam zawng zawng a daih seng lova, chuvangin thalaite chu thiam thil zirna (Skill development) lama nasa leh zuala țan la tur leh MYC kaltlanga training neih mek te chhawr tangkai turin thalai kalkhawmte a sawm a ni.

He huna khual zahawm, Khawbung BDO, Pu James Lalnithanga pawhin thu sawiin Remna chu hun khirh leh harsa tam tak paltlanga kan neih a ni, a ti.

Khawbunga Remna Ni hmanna hi Tuipuiral Group YMA President Pu PB Rosanga'an a kaihhruai a. Rev. Lalhunliana Royte-in hunserh hmangin Group huam chhunga rambuai avanga thite sunna Khawbung Lt. Lalnundawnga kaihhruaiin neih a ni. Political Party hrang hrang Congress, MNF leh ZNP aiawh te pawhin thu an sawi he hunah hian thu an sawi a. Khawbunga Remna Ni hmanna programme hi Pu H. Lalniliana, Tuipuiral Group YMA Vice President chuan lawmthu sawiin a khar a ni.