Vawiin chawhma dar 11 khan Mizoram RMSA Employee welfare Association (MIREWA) General Assembly chu Parliamentary Secretary Pu Joseph Lalhimpuia’n a hmanpui. Pu Joseph Lalhimpuia chuan thusawiin hlawh hi sorkarin a ngai pawimawh a, SSA leh RMSA ten a hun taka hlawh an la mumal thei lo chu sorkarin a ngai mawh a. Delhi-ah Officer-te tirin nawr zui a ni dawn a ti. SSA-in sorkar laipui atangin vbch 37.06 a dawng tawh a, Mizoram sorkarin matching share vbch 6.13 a pe tawh bawk a, tunah hian Finance atangin vbch 1.6 chu beisei mek a ni a. RMSA-ah pawh Govt of India atangin vbch 19.16 hmuh tawh a ni a. State matching share pawh vbch 1.32 pek tawh a ni a, 1.59 chu Finance atanga tihfel mai beisei a ni a ti bawk.

Pu Mahima chuan Mizoram-ah RMSA school 87 kan nei a, school building pawh khaw khatah chuan a chhuanawm ber pawl a ni zel a ni a ti a. Teachers quarters pawh 141 sak tawh a ni a, a dang 61 chu sak leh thuai tum a ni a ti a. RMSA school te chu thingtlang kilkhawr tak tak ni mah se, thawktute thawhrimna avangin zirlaiten HSLC Examination tha takin an pass thei a, thenkhatte phei chu division sang tak takah an pass a, letter marks hmu te pawh an awm nual zel a, a lawmawm hle a ni a ti a. Zirtirtute chu inpekna thuk tak nen an thiamna zirlaite hnenah hlanchhawng a, Mizo nun ze mawi tlawmngaihna leh aia upate zahna tlahniam mek pawh siamthat hna thawk turin a chah a ni.

MIREWA General Assembly hi an pawl Vice President V.Lalawmpuia’n a kaihruai a, District hrang hrang atangin member te an kal khawm a. Chawhnu lamah ro an rel a, an thurel zingah RMSA teacher te tan Mizoram sorkara post create tura ngen te, RMSA school Headmaster post ruakah RMSA teacher thawk lai mekte duhsak an duh thu te, Central atanga RMSA sum lo kal Mizoram Finance Department-a kawl rei lova, chak zawka a kal theih nana sorkar ngen te a tel a ni.

Parliamentary Secretary hi RMSA State Project Office-a Officer ten an tawiawm a ni.