Vawiin hian DC Conference Hall ah Lawngtlai District Chapchar Kut Organising Committee chuan an Chairman leh Lawngtlai Bawrhsap ni bawk Pu J. Hmingthanmawia hovin kumin March ni 4 a Chapchar Kut lo thleng tur hman dan tur an rel.

Meeting chuan kum danga an lo tih tawh thin angin Chapchar Kut ti ringawta hmang lova Lai hnam Kut ropui tak Hlukhla Kut nena a ruala hman a rel a, a hmingah pawh Hlukhla Chapchar Kut tia koh tur a ni. Hei vang hian Kut thlengtu pawh pahnih ruatin Bawrhsap Pu J. Hmingthanmawia’n Hlukhla Kut a thleng anga, LADC CEM Pu VL Hmuaka’n Chapchar Kut a thleng thung dawn a ni. He Hlukhla-Chapchar Pa atan hian Minister Pu C. Ngunlianchunga chu sawm nise tiin a rel bawk.

A hmanna hmun atan Central YLA Playground ruahman a ni a, mipuiten an ngaihhlut theih nan Lai hnam ziarang chi hrang hrang pholang thei thil engemawzat entir tura ruahman a ni a, Costume Parade te, Hlukhla Chapchar Miss thlan te leh Chhawnghnawt runpuite buatsaih tum a ni a, Central YLA kaihhruaina hnuaiah Lawngtlai Town chhunga YLA Branch hrang hrangte, MUP te, LWA te leh zaithiam engemawzat ten hnam lam, zai, hlado leh bawhhlate an en tir bawk ang.

Hlukhla Chapchar Kut hlawhtling taka hman a nih theih nan mawhphurhna hrang hrangte pawh siam niin a bawhzuitu turte pawh inruatfel nghal a ni.