Vawiin khan Information & Public Relation Minister Pu Lal Thanzara chuan Mizo film thar ‘Khuanu Samsuih – II’ chu I&PR Auditorium-ah a tlangzarh a, hemi rual hian sawrkar atanga tanpuina, film assistance Rs. 50,000/- he film siamtu Pu C. Hmingthangvunga hnenah a hlan nghal.

Film tlangzarh inkhawm, I&PR Auditorium-a neihah hian thusawiin Pu Lal Thanzara chuan film tha chuan mipuite thinlungah ram leh hnam hmangaihna a tuh thei a, ram tana inpe turin mipui a ti phur thei a ni, a ti a. Khawtlang nun ti chhe theitu ruihhlo leh thildangte hnualsuat tur leh Mizo nun mawi vung nung tur zawnga tan la tura film siamtute chu chahin, film chu hunawl hnawhkhah nan leh intihhlim nan chauh ni lo, hnam nun inzirtirna hmanraw tha tak a ni, a ti bawk. Sawrkar pawhin film siamtute harsatna a hriatpui tih sawiin Minister chuan, “Sum harsatna karah pawh Film tih hmasawn nan sawrkarin budget-ah sum a dah a ni,” a ti a. State naupang tak ni chunga film lama hnuhma tha leh hlawhtlinna hmu tur a awm thin chu lawmawm a tih thu a sawi bawk.

I&PR Department-a Joint Director, Pi Lalnithangi chuan ‘Khuanu Samsuih – II’ tlangzarh rual a Mizorama film siamtute hamthatna tur, Film Assistance sem a ni chu, “Mumang ram lo thlen dikna a ni a, vawiin hi hlimna ni a ni,” a ti a. I&PR Department hmalakna thenkhat tarlangin, Film hmasawnna chu sawrkarin a ngaih pawimawh thu a tarlang a. Deputy Director leh Nodal Officer Pi Lallianpuii pawhin film hmasawn nana Department hma lakna hrang hrang leh tun hnaia hlawhtlinna thenkhat a tarlang a. Aizawla film siam intihsiakna neih a nih tawh thu leh Mumbai-a neih zawh tak, Mumbai International Film Festival(MIFF)-a Mizo Film siam pahnih, Tranquility (Aizawl traffic jam kara horn hmet lova driver-te polite taka an inpel lai tarlanna) leh Misty Voyage (movie theatre awm tawhloh hnua Mizote film lama tuihalna phuhruk a nih dan tarlanna)-ten ngaihven an hlawh thu a sawi a.

‘Khuanu Samsuih – II’ producer leh a changtupa ni bawk Pu C. Hmingthangvunga chuan film siam a nih dan report a pe a. Hlawhtling taka a feature film siam pathumna, ‘Khuanu Samsuih – II,’ film khawvela a luh kum 20-na chiah a tlangzarh a ni leh, Film tlangzarh saktu, Minister Pu Lal Thanzara chuan hun chep tak kara a film zawng zawng a la tlangzarh sak thei zel chu lawmawm a tih thu a sawi bawk. MDFS Vice President Pu Lalawmpuia Khiangte pawhin thu sawiin Mizoram sawrkarin film siamtute a duhsaknaah lawmthu sawiin film siamtute pawh zahawm taka hun hmang turin a fuih bawk.

‘Khuanu Samsuih – II’ hi big screen a en theih tur chauhva ruahman a ni a, CD/DVD copy hralh chhuah a ni dawnlo a ni. Tlangzarhna inkhawm hi MFDS Executive member, Dr. Louis Hauhnar in a kaihruai a ni.

Attachment

  • Loading attachment...