Tukin khan Minister of State for AH & Vety leh Lawngtlai West bialtu MLA ni bawk Pu C. Ngunlianchunga chuan Lawngtlai District Civil Hospital Building thar sakna tur hmun a tlawh a, hna tan a nih thuai theih dan tur PWD hotute a sawipui nghal.

Minister chuan, tuna Lawngtlai Hospital hi khum 30 awmna a ni a, mipuite mamawhna a phuhru zo ta meuh lo a ni. Hei vang hian sawrkarin ruahmanna siamin Hospital Building thar sak a tum ta a ni. OPD Building thar pawh sak zawh fel chiah niin Health Department hnenah a satu PWD ten an hlan tawh a. Hospital Building pawh harsatna dangte a awmlo a nih chuan chak taka sak a ni ang, a ti.

Ministry of DoNER (NLCPR) sum hmanga sak tur Lawngtlai District Hospital hi khum 50 awm theihna tur a ni a, khum 100 awm theihna thlenga tihlen awlsam thei tura ruahman lawk ani. Estimate Amount hi Rs 1191.51 Lakhs niin tunah hian Central atangin Sunction hmuh tawh a ni a, Preliminary Estimate siam mek niin April thla chho velah chuan Tender theih mai a nih beisei a ni.

Minister hi Lawngtlai Bawrhsap Pu J. Hmingthanmawia, bakah PWD hotu lian, Pu Lalmuankima Henry, CE Building, Pu Bowmen, SE Project Circle, Pu George Lalzuia, Chief Architect te leh Pu Maipa, EE Lunglei ten an tawiawm a, Lawngtlai Hospitala Doctor te leh Chief Medical Officer Dr. HC Thangkima ten an lo dawngsawng a ni.

Hemi hnu hian Minister hian Thingkah khaw khelmual, State Sports Council sum Rs 7 lakh senga laih mek chu a tlawh leh a, he khelmual hi Rs 7 lakh hian laih zawh fel theih loh deuh dawna a lan avangin  MLA Fund Rs 3 lakh pek belh a tum thu khawtlang hruaitute a hrilh a ni.