Vawiin khan District Magistrate Pu H. Lalengmawia, IAS chu Mualkhang ram chhunga Rel kawng laih mekah kalin helai hmuna ram neitu thenkhat ten hnathawktu te hnathawh an remtih loh entir nana an ram chin an hungna leh kal kawng an dan pin (block) te chu dan angin a nawr chhiat tir a. Heng hungna leh kawng dan pinna te hi JCB leh Excavator hmanga senghawi anih hnuin kawng laih hna hi thawh nghal a ni.

District Magistrate hi Kolasib District a Magistrate 4, SDPO Kolasib bakah North East Frontier Railways aiawhte leh chanchinbu miten an tawiawm a, helai hmuna ram neitu aiawhte pawh he hmunah hian an awm bawk a ni. Ist IR Battalion a sipai platoon khat pawh mamawh thuah a hmunah an awm bawk a ni. District Magistrate Pu H. Lalengmawia chuan Rel kawng siam mekah hmun hrang hranga harsatna awm te chu chin fel zel a nih thu a sawi. Helai hmun pawh hi Dan anga tih fel tawh a ni a. Zangnadawmna pek chhuah hnu-ah dilna thar Sawrkar in a dawng a, chung dilna te chu Revenue Department, DC Kolasib leh Railways te hova enfiah leh finfiah a ni a. Helai hmuna ram neitu nia inchhal mi engemaw zat atangin mi 11 te chu a ram neitu dik tak nia hmuhchhuah niin zangnadawmna an dawn theih nan chung zinga mi 7 te chu assessment tihsak an ni tawh a, a dang 4 assessment la tih hmabak te chu a rang lamin tihfel anih tur thu sawiin, tunah hian Sawrkar in a tih tur a ti fel tawh a, chutih laia hnathawh theih loh khawpa harsatna siam hi a dik tawh lo a, a ram neitute nen eng kim sawihoin ngaihtuah fel a ni tawh a, chuvangin heng an dan pinna leh huan an huangna te hi an mahni awmlai ngeiin ka senghawi a ni, a ti.

North-East Frontier Railway Dy Chief Engineer Pu Hari Singh chuan Mizoram Sawrkar abik takin District Magistrate Kolasib te hmalaknaa lawmthu sawiin hun engemaw chen an hna khaihlak chu an tan leh thei dawn a ni a ti.

Mualkhang ram chhungah hian mi 148 hnena pek tur Zangnadawmna pawisa siam a ni a. Mahse thubuai kalpui lai a awm avangin mi 118 chauh pek an ni a. Hetianga tih fel hnu hian mi 32 ten dilna thar an rawn siam leh a; chungte chu thuneituten a hmuna an enfiah hnu-ah mi 11 te chu pek leh tura chhawp mek an ni a. A dang 21 te chu a dik tawk lo tiin sawrkar chuan a hnawl rih niin a hmuna kal ve Officers te chuan an sawi.