Hmunphiah chungchangah Environment & Forest Department chuan a hnuai ami ang hian thuchhuah a siam :
Hmunphiah hi Mizoram Forest Act, 1955 in Minor Forest Produce a tih zing ah a tel a. Tunah hian Mizoram a Reserved Forest leh Government land/forest a hmunphiah tualto (mimal chin ni lo) Forest Division thenkhat ami te chu Sorkarin Revenue tam zawk hmuh theih nan Quotation kovin Royalty rate Rs. 7/- per Kg. aia hniam lova a chhang sang berte hnenah tender a pek an ni a.
Hmunphiah tam vak lohna leh Quotation chhangtu awm lohna Forest Division ah te erawh chuan a duh apiang hnenah Hmunphiah tualto lak phalna Permit pek theih a ni a, Royalty Rs. 7/- per Kg. chawi a ngai thung.
NLUP leh mimal huana chin Hmunphiah te hi Forest Department in a tender ve lova. Mimal Hmunphiah te hi chu a neitu-in Royalty chawi lovin lak theih a ni a, an duhna hmun apiang ah an hralh thei. Amaherawhchu State pawna thawn chhuah dawnah Administrative charge Rs. 1/- per Kg. chawiin Transit Pass (TP) lak a ngai thung a ni. Mimal chin Hmunphiah Forest Department in a tender niawm anga sawi hi thu diklo a ni. NLUP hmanga chingtute chuan Soil Department atangin thlan an nihna leh ram zau zawng, hmunphiah neih zat Forest Department ah an thehluh a ngai thung.
Forest Right Act, 2006 Section 3-na hnuaiah Hmunphiah tualto (minor forest produce) hi Royalty chawi lova lak phalsak theih dan (‘Right’ pek theih dan) a awm a. Chutiang ‘right’ claim-tu chu ramngaw (forest) chhunga cheng Tribal emaw, Tribal ni lo, chhuan thum (75 years) kalta atanga tun thlenga forest a cheng chhungkua (forest dwellers) leh intunnun leh eizawn nana forest a innghat an nih a ngai a; tin, right an claim na ram chu ni 13.12.2005 hma lama an lo luah thin leh hman tangkai tawh thin ram a nih a ngai bawk. Chutiang ‘right’ claim tur chuan a bialtu khua Gram sabha (VC) ah dilna siam a ngai a, chu dilna chu chumi khua a Forest Rights Committee in a endik ang a, chumi hnuah Sub-divisional Level Committee leh District Level Committee te’n an pawmpui leh a ngai a ni.
Tin, tualchhung chanchinbu thenkhatah Hmunphiah dan ang thlapa hralh te Lailapur Forest Checkgate-ah dan a ni thin tih leh Kolasib Division chhunga Hmunphiah mahal system a kalpui avangin mimal Hmunphiah neitute’n harsatna tawk angin tarlan a ni a. Ni 21.01.2016 khan Hmunphiah trip khat TP tel lova kal chu Lailapur Forest Checkgate ah an lo tiding a, a tukah Bilkhawthlir RO hnen atangin TP an lak hnu ah chhuah leh nghal a ni. Tin, Hmunphiah tualto mahal system a kalpui a nih avanga harsatna an tawh thu Forest Department-in Hmunphiah chingtute atangin a la dawng lo. Tunah (27.01.2016) hian Vairengte ah Hmunphiah hring 1st Class Kg.1 Rs. 35/- in an hralh mek a, Saiphai ah Kg.1 Rs. 40/- in an hralh mek bawk. Nikum lam aiin a rate hi a sang chho mek a ni. February thla hi Hmunphiah man to lai ber a ni thin a, tun aia rate tha zawkin an la hralh theih rin a ni. Hmunphiah hring Kg.3 leh a ro Kg.1 hi intluk anga ngaih a ni.
