3102/2024-2025

Dated Aizawl, the 20th November 2024: Vawiin khan Chief Minister Pu Lalduhoma hovin a office-ah Mizoram Agricultural Marketing Board te chuan Sairang Horticulture Centre, sawhthing sawngbawl nana buatsaih dan tur leh Hmunphiah ro lei thei tur firm zawn mek chungchang sawihona an nei.

Hmunphiah ro bik hi Support Price fel fai taka kalpui a nih theih nan sawrkar hriatpui firm te kal tlanga lei a ngai ni a ngaih a ni a. Chuvang chuan sawrkar chuan October ni 17 khan Hmunphiah ro lei duh tur firm leh an lei ngamna zat te, an lei tam theih zawng turte zawnna (expression of interest) a tichhuak a ni. Vawiin thlengin sumdawng (firm) 13 ten an chhang tawh a, an zinga firm pathum (3) te hian sawrkar rate bituk anga an lei ngam thu an tarlang.

Vawiina meeting hian, huntiam chhunga sawrkar rate anga chhang ngam dang an awm loh chuan, a chhang ngam awm chhun pathumte hi sawrkar hriatpuia leitu atana ruat (empanel) mai tura ruahmanna siam ni se, an ti.

Sairang Horticulture Centre dinhmun sawihona an nei bawk a. He hmun Sawhthing Processing Unit kalpui nana hman diltu Company pathum aiawhte nena inkawmna te neiin, unit changtlung taka chantir dan tur hi an duang zui a ni.

Meeting-ah hian Dr. KC Lalmalsawmzauva, Adviser to CM leh MAMB member te an tel a ni.