Sorkar laipui hnuaia Department of Science & Technology bultum a siam  Hmunpui khuaa ruahtui khawlna Tuizem 12 chu vawiin khan Pu John Rotluangliana, Minister FCS&CA etc. in a hawng.

Pu John Rotluangliana chuan ruahtui khawlna Tuizem 12 lai Hmunpui khua in an nei chu ropui a tih thu sawiin, uluk leh dimdawi taka enkawl turin a chah a.Tui sem pawh diktaka sem a, khawtlang hmasawnna leh hriselna a thlen ngei a duhsak thu a sawi. Minister chuan Food Security Act hnuaia ration card siam sual awm chu pawi a tih thu sawiin theihtawp chhuahin siamthat hna thawh chhunzawm zel a nih thu a sawi a, April thlaa zawh a nih ngei tur thu a sawi. Furpui vanga Buhfai Kudam ruak a awm loh nan buhfai dahkhawl zel a nih thu a sawi bawk.

Vawiin a ruahtui khawlna Tuizem hawn tak te hi sorkar laipui hnuaia Department of Science & Technology(under water technology initiative) in sum thawhin, Mizoram Science, Technology and Innovation Council (MISTIC), Directorate of Science & Technology ten an sak hna an thawk a ni.Heng tuizem siam nan hian sorkar laipui chuan Rs.1,62,83,700/- rawn pe in, state sorkarin Rs.20,36,000/-a pe bawk.

Ruahtui khawlna Tuizem siamna hmun te hi mimalin a thlawnin ram an pek a ni a, tuizem 12 ah hian ruahtui 30 lacs ltr a khawl theih a ni. Hmunpui khuaah hian  chhungkaw 200 an cheng mek a, chhungkaw 20 in Tuizem pakhat hi an in hman tawm a ni.Tuizem enkawl hna hi Hmumpui Branch YMA in cluster hrang hrang a insiamin an enkawl zui ang.

Vawiin Tuizem hawnna inkhawm hi Community Hall-ah neih a ni a, Dr.RK Lallianthanga, Chief Scientific Officer, in a kaihruai a ni