Sawrkar laipuia Ministry of Minority Affairs Secretary Rakesh Garg hovin nimin khan State Guest House ah meeting pawimawh neih a ni.
Pu Rakesh Garg chuan Ministry of Minority Affairs hnuaiah mipuite tan hamthatna hmuh tur tam tak a awm a, chung zinga thenkhat Mizoram sawrkarin haichhuakin hmang tangkai mek mahse an la hmelhriat loh scheme engmawzat a awm a, sakhua leh hnam tlem zawkte chawikan nan sawrkar laipuiin scheme a siamte chu chhawr tangkai lehzual turin official kalkhawmte a fuih.
Union Secretary ho hian Minority Affairs hnuaia scheme khawihtu department te bakah Aizawl, Lawngtlai leh Mamit DC ten Prime Minister’s New 15 Point Programme, Multi Sectoral Development Project (MSDP) leh Scheme dangte kaltlanga Mizoram chhunga hmalakna hrang hrang an sawiho a. Harsatna an tawhte leh rawtna hrang hrang an neihte sawiho a ni.
Ministry of Minority Affairs hnuaiah hian MSDP, PM’s New 15 Point Programme, Scholarship, Free Coaching, "Nai Roshni"- hnam tlem zawk hmeichhiate chawikanna scheme te, Seekho aur Kamao(Learn & Earn)" tih te, UPSC Prelims exam paltlangte tana sumfai lak theihna te,“Hamari Dharohar”- hnam tlem zawkte culture vawnhimna lam hawite leh thil dang tam tak a awm a. Hengte hi State sawrkar ten tangkai takin an hmang thei a ni.
Meeting ah hian Social Welfare, Home Department, Health, Higher & Technical Education, School Education, Rural Development, PHE, Finance, District Council & Minority Affairs Department aiawhte bakah Aizawl, Lawngtlai leh Mamit DC te an tel.
