3795/2023-2024

Hnahthial the 13th February 2024: District Consultative Committee (DCC), District Level Review Committee (DLRC) leh District Level Security Committee (DLSC) te chu vawiin khan an Chairman, District Bawhrsap Pu Chuauhnuna hovin DC Meeting Hall, Hnahthial-ah an thu khawm a, Chairman chuan Potential Linked Credit Plan, 2024-2025 a tlangzarh nghal. He hunah hian kum 2023 October thla atanga December thla (3RD Quarter) chhunga Hnahthial District- a bank hrang hrangte hnathawh thlirlet niin hma lak zui dan tur rel nghal a ni.

District Bawrhsap in a sawm angin Pu H Lalhlimpuia, Chief Manager, Lead Bank Office, Lunglei chuan thutkhawm chhan tarlangin agenda sawi hawnna a nei a, bank-te chu hmasawnna ruhrel thlen theitu an ni tiin line department-te nen tangkawpa mipui tan theihtawp chhuah turin a chah.

Thutkhawm chuan mipui-te awlsam zawka bank loan pekchhuah an nih theih nan Hnahthial District chhunga department awm te chu bank-te chu inrawn tawn thin se a ti a, hemi chungchangah hian bank te chu february thla chhungin department hotute nen thukhawmin sawi ho se a ti. Hnahthial district chhunga bank awm panga- SBI Hnahthial, MCAB Hnahthial, MRB Hnahthial, MRB Pangzawl leh MRB South Vanlaiphai-ah kangmei leh rikrum thil laka inven nan fire extinguisher, alarm system, smoke detector etc vuah vek tawh a ni chu lawmawm hle, a ti bawk. Sorkar laipui hnuaia Social Security Scheme hrang hrang (PMSBY, PMJJBY, APY) inziaklut te dinhmun enho a ni a, tan la lehzual tur leh a bik takin heng hamthatna awm te mipuiin an chhawr lehzual theih nan bank te chu inzirtirna (financial literacy campaign) uar lehzual tura ngen an ni a, RBI duh dan angin quarter khatah vawi 3 tal inzirtirna nei thin turin leh loan thi (non-performing assets) a tlem zel theih nan theihtawp chhuah tura ngen an ni bawk.

Vawiin meeting chuan banka mipuiin sum an dah luh ( deposit) zat za zela bank in mipuia sum an puktir (credit) zat chhutna, Credit/Deposit Ratio ah December 2023 thleng 58.75 % chu Reserve Bank of India (RBI) in a bituk zat 60% aia a tlem thu tarlangin tan la thar turin a chah. December 2023 thleng khan Sorkar sponser scheme, PMEGP ah project 8 bank hrang hrangah forward tawh in loan sanction erawh a la awm lo a, sanction thuai tur a nih thu tarlan a ni bawk. Mudra loan bikah Shishu loan (cheng 50,000/- chin ) 22 pekchhuah tawh a ni a, Kishore loan (50,000-5 lakhs chin) 32 pekchhuah tawh niin Tarun loan (5-10 lakhs) 9 pek chhuah tawh a nih thu tarlan a ni. Vawiin thutkhawm kaihruaitu chuan Hnahthial District in hmasawnna hmel a hmuh zel theih nan bank leh department te tanrual a ngai hle a ti a, bank dawr nuam leh mipuite tana rintlak ni theuh turin a sawm bawk.

Vawiin thutkhawm-ah hian Deputy Commissioner Pu Chuauhnuna leh Chief Manager LBO, Lunglei Pu H Lalhlimpuia te bakah DDM, NABARD, Lunglei te, Lead District Officer, RBI Aizawl te, regional manager-MRB, RBO, Lunglei leh Hnahthial district bank manager te, line department hotute an tel a ni.