2250/2023-2024

Hnahthial the 10th October 2023: Kumin inthlanpui lo thleng tur inbuatsaihna kal zelah vawiin khan Hnahthial District, South Tuipui Assembly Constituency huam chhunga polling station mamawh hrang hrang (Assured Minimum Facilities) en ho niin District Election Officer, District Bawrhsap ni bawk Pu Chuauhnuna kaihruaina hnuaiah Department hrang hrang; Education, PWD, PHED leh P & E hotu ten sawihona neiin an thukhawm.

District Bawrhsap Pu Chuauhnuna chuan inthlan felfai tak leh tluang tak nei tur chuan Polling Station-a Assured Minimun Facilities (AMF) ngaih pawimawh a ngai hle a ti a, mipui rorelna ram (democracy) ah chuan vote thlak chu mimal dikna chanvo a ni tiin mitinin awlsam taka vote an thlak theih nan theihtawp chhuah a tul a ti bawk.

He hunah hian South Tuipui AC a Sector Officers pathum te pawhin an sector huam chhunga facilities dinhmun report an pe a, a tul anga bawhzui nghal thuai tura hriattir an ni bawk a ni. Vawiin thutkhawmah hian District Election Officer leh Bawrhsap Pu Chuauhnuna, Returning Officer, Addl DC ni bawk Pu Lalvenhima, Election Officer Pu Lalbiakfela, SDC Pi Betty Lalrinfeli te bakah Hnahthial District Education Officer Pu Micky Lalenkawla, SDEO Pu Lalthlamuana Tochhong, Pu Darthangvunga, EE (PHED), Pu H Lalnunmawia SDO (PWD) leh Pu B Lalchhanhima SDO (P & E) te an tel a ni.