325/2024-2025 

Hnahthial the 20th April 2024: Vawiin khan Hnahthial DC Meeting Hall, Rallangtlang-ah Assistant Returning Officer (ARO), District Bawrhsap ni bawk Pu Chuauhnuna leh Senior Micro Observer Dr. Henry Saprinliana hovin Post Poll Scrutiny neih a ni a, Form 17A (Register of Voters), Presiding Officers Diary-te leh document pawimawh dangte enfiah a ni.

District Bawrhsap Pu K. Chuauhnuna chuan nimin Lok Sabha inthlanpui harsatna lian tham awm lova zawh fel a ni ta chu lawmawm a tih thu a sawi a, vawiin scrutiny neih chhan chu inthlan kaihhnawihah thil fel hlel a awm leh awm loh endik a ni a ti bawk.

Vawiin Post Poll Scrutiny-ah hian Election Commission of India-in tehfung hrang hrang a siam te hmangin Senior Micro Observer hmuh laiin lehkha pawimawhte chu enfiah an ni a. Uluk taka enfiah an nih hnuah thil dik lo leh felhlel a awmlo a ni tih lungrual takin official leh Political Party aiawh te hian an pawm a, heng endik tawh lehkha pawimawh te hi Political party te leh kalkhawm dangte hmuh laiin Strong room-a kalh hnan niin vote chhiar hunah hawn a ni chauh tawh dawn a ni.