No.1627/2020-2021

National Vector Borne Disease Control Programme hnuaiah District Hospital Hnahthial buatsaihin vawiin khan Health Sub-Centre, Electric veng Hnahthial-ah Thosilen semchhuah hun hman niin District Bawrhsap Pu Vanlalmawia chuan Khuallian niin a sem chhuak.

Hnahthial District Bawrhsap Pu Vanlalmawia chuan "Natna thenkhat hian vawilehkhat ah min ti thi thut lova, zawi zawiin min ti chhia a ni. Chutiang natna min thlentu te lakah chuan kan fimkhur a pawimawhin Health Department hnuaia thawktute do turah chauh dah lovin mitin hian kan mawhphurhna ah theuh lain do rem hna kan thawh tlan a ngai a ni”, a ti.

Sawrkar hian mipuite hamthatna tura theihtawp chhuahin kawng hrang hrangah a thlawnin tanpuina sem a nih thin thu Hnahthial District Bawrhsap Pu Vanlalmawia chuan sawiin "Tunah pawh Malaria natna laka mitinte kan him theih nan Thosilen sem a ni dawn a, hengte hi tangkai takin a hmanna tur dik takah chauh i hmang ang u" tiin kalkhawmte chu mahni zawnah theuh hriselna kawnga hma la turin a chah a ni

Semchhuahna inkhawm tawi kaihruaitu Dr.Lalrengpuii Ralte, Medical Officer, District Hospital Hnahthial chuan "Hnahthial hi kum 2007 vel kha chuan Mizoram mai ni lovin India rama Malaria tamna niin sawi a ni thin a, Health Department-a thawktute leh khawtlang tangrual chuan theihtawpa hma an lak avangin tunah chuan Malaria hi umbo mek a ni a, nikum 2019 khan Malaria natna vei hi mi 23 chiah hmuh chhuah niin pakhat mahin an thih pui lo a ni" a ti.

District Hospital Hnahthial huamchhunga chhungkaw tinah Thosilen hi sem tura ruahman niin Electric venga Sub-Centre huamchhung chhungkaw 1210 hnenah vawiin khan pek chhuah hna hi kalpui a ni.