No.1626/2020-2021

Kan hriat theuh angin hripui rapthlak tak COVID – 19 leng mek avangin khawvel hi a buai a, ram hrang hrangte chuan theih tawp chhuahin an do mek a ni. Keini ram ngei pawh min rûn a, sawrkar chuan a theihna zawng zawng sawr khawmin kan himna tur kawng a zawng a, rim takin a thawk mek a ni.

He hri hian Mizoram ngei pawh a luh chilh a, sawrkar chakna mai ni lo, kohhran leh khawtlang pawhin kan eng kim kan hlan a, kan himna tur kan zawng mêk a ni. Hun harsain min nang a, kan u leh nau tam tak, ram pawna awmte pawhin mahni khua an rawn pan a ngai a; sawrkar ruahmanna tha tak hnuaiah kan duh rêng vang pawh ni lovin haw runpui kan nei mup mup a nih hi.

Mizorama district sawmlehpakhat (11) zingah hian Aizawl tih lohah chuan Siaha hian ram pawnah mi kan tir chhuak hnem ber a, 1300 chuang lai kan ni. Heng zinga a tam zawk chu an rawn lêt tawh a, kawnga thang mek an awm bawk a, haw tura inbuatsaih mekte pawh an la awm zel a ni.

Ram pawn atanga lo hawte hi sawrkar ruahmannain an hriselna dinhmun thlithlai nan ni 14 khung hran an ni a, an ei leh in zawng zawng hi sawrkar leh mi inphalte thawhlawm tling khawm hmanga ngaihtuah a ni. Mi sang chuang teuh meuh kar hnih chhung enkawl hi hna hautak leh awm khauh tak a ni a, sum leh pai baka tha leh zung kan sen zawng zawng hi a na mai lo hle.

Ramin hun harsa a tawh mek lai hian sawrkar tha tichak tura kan pên chhuah a ngai ta. Kan hun tawng mêk hi sawrkar chauhina a mal khalh a tan chuan a hrawl deuh a ni. Chuvangin, he ral donaa hnehna kan chan theih nan kan vaia kan tan tlan a ngai a, kan sum leh pai te pawh kan theh chhuah a hun ta.

Ram dang atanga lo haw, kan u leh naute enkawlna atan tam tak chuan sawrkarah thilpek kan hlàn tawh a; chungte chu hmanraw thil ti theiah an chang mêk a, kan lawm em em a ni. Nimahsela, kan ral beih hi a la zo lo a, tha kan thlah a rem lo. Chuvangin, Siaha District chhunga cheng zawng zawngte i tang tlang teh ang u; kan tha kher kan thawh a rem lo a ni thei e, kan sum leh pai kan thawh khan kawng ro a su nasa em em a, sawrkar tan a tangkai em em a ni.

Uluk leh zuala hri dai kan theu a ngaih avangin khawtlang, kohhran chhungkua leh mimal tinte phurrit inchhawk tawna thawk chhuak turin kan inngen e.