4133/2024-2025

Dated Hnahthial, the 7th February, 2025: Vawiin chawhma khan Hnahthial District Fisheries Development Office (DFDO) chuan Venglai YMA Hall-ah Hnahthial chhehvela tualchhung Sangha man leh zuartute ko khawmin 'The Mizoram Fisheries Act 2022' chungchang inhrilhhriatna hun (Awareness Campaign) an buatsaih a. Pu George Lalnuntluanga, DFDO, Pi F.Lalhmangaihzuali, Program Officer, PMMSY leh Pi V. Lalnuntluangi, LDC ten kalkhawmte hi zirtirna an pe a ni.

He hunah hian Pu George Lalnuntluanga, District Fisheries Development Officer (DFDO) chuan Hnahthial chu District a lo nih tak avangin kawng hrang hrangah hmasawnna hmuh tur a awm chho zel a ani a ti a. Dan leh hrai, kalphung hrang hrang a pian chhoh zel avangin tun hma a eizawn nana kan lo hman thin Sangha te pawh Danin a humhalh tlat thu leh Licence nei lo a lui kal leh Sangha zuarte chu Dan hmanga man theih an nih thu a sawi a. The Mizoram Fisheries (Amendment) Act 2022 chu kan hriat a kan zawm ngei ngei a ngai a ni tiin lui kal thinte pawh he Act hnuaiah hian him dam taka an awm theih nan licence an lak a ngai a ni a ti a. Chutiang bawkin Sangha, a rep chen a zuartute pawhin an khar chhawnna ten licence an neih loh a, lui sangha man an kharchhawng a nih chuan man theih an nih thu a tarlang a. He Act hnuaia man/case siam sak an nih chuan First Class Magistrate hmaah thubuai neiin in sawifiah ngei ngei ngai a ni a ti.

He hunah hian zawhna leh chhanna hun hman a ni a. Tualchhung lui sangha hmanga eizawng te pawhin thu sawiin an hriat loh avanga Dan an lo bawhchhe thin chu an inthiamloh thu leh Dan hnuaiah himdam taka an eizawnna kalpui an tum tawh thu an sawi a. District Fisheries Development Office ten zirtirna leh inhrilhhriatna hun an buatsaih chu lawmawm an tih thu sawiin Licence dilna Form pawh engemawzat an la chhuak nghal a ni.