2230/2023-2024
Hnahthial the 9th Oct 2023: Hnahthial District Bawrhsap Pu Chuauhnuna chuan vawiin khan MLA General election-a poster, pamphlet chhut chungchang phal chin a hnuai ang hian thu a chhuah.
MLA General Election, 2023 lo awm tur ah Section 127 A, Representation of the People Act, 1951 in Poster, pamphlet etc chhut chungchang a phal chin chu hengte hi a ni.
(1) Mi tumahin inthlan kaihhnawi poster/pamphlet a chhutin emaw, chhu tura hma a lakin emaw a chhutu leh chhuahtu hming leh address lang tel lovin an chhuin an chhuah tur a ni lo.
(2) Inthlan kaihhnawi poster/pamphlet chhut a nih chuan henge hi zawm ngei ngei tur-
(a) Chhut tura thu petu chuan midang pahnih hriatpuina hming ziak nen a chhutu hnenah a chhuahtu (Publisher) kimchang ziahna (declaration) copy hnih (Duplicate) a pe ang.
(b) A chhutu chuan a thu chhut copy khat leh declaration copy chu heng mite hnenah hian a pe hmasa ang -
(i) State Capital-a chhut a nih chuan, Chief Electoral Officer hnenah.
(il) Hmun danga chhut a nih chuan a chhutna hmuna District
Magistrate hnenah.
(3) Hemi chungchang bikah hian -
(a) Lehkha eng pawh a copy tihpun a nih a, kutziaka lakchhawn ni lo chu 'Khawl chhut' anga chhiar vek tur a ni a, 'A chhutu' tih
tarlan tulna hian a huam vek.
(b) "Inthlan kaihhnawi poster leh pamphlet" tih hian khawla chhut pamphlet, handbill (lehkha phêk tê) leh lehkha semdarh chi dang eng pawh, candidate tu emaw fakna leh sawiselna keng tel reng reng a huam a. Amaherawhchu, lehkha phêk tê emaw, poster emaw thuziak dang, candidate tu emaw fakna emaw sawiselna lam emaw nilêm lo, vantlang inkhawm hun puanzarna ang chite leh party mite thu pawimawh inhrilhhriatna lehkha ang chite chu a huam lo.
(4) He Dan, sub section (1) leh Sub Section (2) bawhchhia reng reng chu thlaruk thleng lungin tan leh Rs. 2000 thleng chawitir emaw, a pahnih emaw hmang hian hrem theih an ni.
